Украина АҚШ билан музокарани давом эттиришга тайёр – Зеленский

Украина Президенти Владимир Зеленский Буюк Британияни тарк этишидан олдин АҚШ Президенти Дональд Трамп билан муносабатлари давом этишини айтди. Бу ҳақда “Strana.ua” хабар берди.

“Украина ҳали ҳам АҚШ билан хомашё шартномасини имзолашга тайёр”, деган Зеленский.

Шунингдек, Зеленский Ғарбнинг Украинани қўллаб-қувватлаши давом этишини ҳам қўшимча қилган.

Бундан ташқари, Зеленский истеъфога чиқиш ниятида эмаслигини яна бир бор очиқлаган. У ўзини “алмаштириш қийин” бўлишини айтган.

“Сайловларни шунчаки ўтказишнинг ўзи етарли эмас. Улар менинг иштирок этишимга рухсат бермасликлари керак. Ва бу бироз қийинроқ бўлади. Чунки сиз ҳали ҳам мен билан музокара қилишингиз керак” деган у.

Қайд этилишича, Украина раҳбари Трамп маслаҳатчиси Майкл Уолтц ва Вакиллар палатаси спикери Майк Жонсоннинг Қўшма Штатлар Зеленский тинч йўл билан келишувга рози бўлмаса, уни алмаштириш тарафдори эканлигига ишора қилган баёнотларини шундай изоҳлаган.

Шунингдек, Зеленский ўз истеъфосини Украинанинг НАТОга қабул қилинишига алмаштиришга тайёрлигини қўшимча қилган.

Зеленскийнинг айтишича, тинчликка эришиш учун “ҳали жуда ва жуда узоқ йўл” бор.

“Буни ҳали ҳеч ким бошламаган”, дея қўшимча қилди Зеленский.

Шу билан бирга, Зеленский Ғарб қўшинларининг “денгизда, қуруқликда ва осмонда” мавжудлиги хавфсизлик кафолати сифатида қаралиши мумкинлигини айтган.

Эслатиб ўтамиз, жорий йилнинг 1 март куни Украина Президенти Владимир Зеленский ва унинг америкалик мавқедоши Дональд Трамп ўртасидаги музокаралар ортидан АҚШнинг Мэриленд штатидаги ҳарбий базадан ҳавога кўтарилган Украина ҳукумати самолёти Лондон аэропортига қўнганди. 2 март куни эса Лондонда Украина бўйича саммит бўлиб ўтганди. Ушбу саммитда НАТО Бош котиби Марк Рютте ва Польша Президенти Анжей Дуда Украина Президенти Владимир Зеленский Оқ уйда Дональд Трамп билан жанжалли музокаралардан сўнг АҚШ билан мулоқотдан бош тортмаслиги кераклиги ҳақида фикр билдирганди.