UFC Оқ уй турнири учун асосий жангларни эълон қилди

UFC жорий йилнинг июнь ойида Оқ уй ҳудудида ўтказилиши режалаштирилган турнир учун айрим жангларни расман эълон қилди. Бу ҳақда турнир расмий саҳифаси хабар берди.

Мазкур ММА шоу янги форматда ташкил этилади. Турнир АҚШ мустақиллигининг 250 йиллиги муносабати билан ўтказилади ва 2026 йил 14 июнга белгиланган.

Кечанинг асосий жангида енгил вазн тоифасининг амалдаги ва вақтинчалик чемпионлари – Илия Топурия ҳамда Жастин Гэйтжи ўзаро тўқнаш келади.

“Бизнинг матчмейкерларимиз турли вариантларни муҳокама қилди ва қайси жангларни ташкил қилиш мумкинлигини аниқлашди. Шундан сўнг улар менга таклифлар билан қайтди ва мен якуний режа туздим”, дейди UFC президенти Дана Уайт.

Кечанинг яна бир марказий жанги вақтинчалик оғир вазн тоифаси (120,2 кг гача) чемпионлик камари учун бўлиб ўтади. Унда франциялик Сирил Ган бразилиялик Алекс Перейрага қарши октагонга чиқади.

Амалдаги чемпион, британиялик Том Аспиналл эса Ган билан жангда олган кўз жароҳатидан тикланаётганлиги сабабли турнирда қатнаша олмайди.

Шунингдек, қуйидаги жанглар ҳам эълон қилинди:

• Шон О’Мэлли – Айманн Захаби;
• Маурисио Руффи – Майкл Чендлер;
• Бо Никал – Кайл Докас;
• Диего Лопес – Стив Гарсия.