Туркиядаги кема ёнғинида жароҳатланганлар борлиги маълум бўлди

Кеча, 13 август куни Туркиянинг Муғла вилояти Фетҳие тумани яқинида 115 нафар йўловчиси бўлган сайёҳлик кемасида ёнғин содир бўлган эди.  Юз берган ёнғин оқибатида эса 15 киши танасининг турли қисмларидан куйиш жароҳати олгани маълум бўлди. Бу ҳақда “Haberler” хабар берди.

Қайд этилишича, жароҳатланганлар ёнғин вақтида қутқарув жилетларини кийиб денгизга сакраган йўловчилар орасида бўлган.

Нашрга кўра, улар шифохонага ётқизилган бўлиб, даволанишни давом эттирмоқда.

Маълумот учун, ёнғин содир бўлган куни бортдаги 115 кишининг барчаси эвакуация қилингани ва ҳалок бўлганлар йўқлиги билдирилган эди. Ҳодиса жойига Соҳил қўриқлаш хизмати, тиббий бригадалар ҳамда қутқарув гуруҳлари юборилган. Шу билан бирга, яқин атрофдаги қайиқлар ҳам қутқарув ишларида иштирок этган. Натижада кемадаги барча йўловчилар хавфсиз тарзда қутқариб олинган.

Шунингдек, маҳаллий ОАВлар ёнғин оқибатида жиддий зарар кўрган қайиқнинг алангага ўралган ҳолати ҳаводан тасвирга олинганини ҳам маълум қилган.

Эслатиб ўтамиз, аввалроқ Туркиянинг Мармарис шаҳри яқинида 110 нафар йўловчи бўлган сайёҳлик кемаси чўкиб кетганди.