Туркияда занжирли ЙТҲ оқибатида 11 киши ҳалок бўлди, 40 га яқин киши жароҳатланди (видео)

Туркияда автобус ва бир нечта енгил автомобил иштирокида йўл-транспорт ҳодисаси содир бўлди. Бу ҳақда Halq TV телеканали хабар берди. 

Айтилишича, кеча, 26 май куни TAG автомагистралида автобус, юк машиналари ва енгил автомобиллар иштирокида занжирли ЙТҲ содир бўлган. Телеканал Мерсин губернатори Али Ҳамза Пеҳливанга таяниб, йўл-транспорт ҳодисаси оқибатида 11 киши ҳалок бўлгани, камида 38 киши жароҳатланганини маълум қилди.

Қайд этилишича, Адана шаҳридан ҳаракатланаётган автобус ёмғирли ҳавода сирпаниб кетиб, ағдарилиб, қарама-қарши йўлга чиқиб кетган. Ҳудудга ўт ўчирувчилар ва тиббиёт гуруҳлари жўнатилган. Воқеа жойидан олинган дастлабки маълумотларга кўра, жабрланганларнинг айримларининг аҳволи оғир.

Туркия Адлия вазири Йилмаз Тунч бахтсиз ҳодисага изоҳ бериб, ҳалок бўлганларнинг оила аъзоларига ҳамдардлик билдирди. Унинг сўзларига кўра, иш ҳар томонлама чуқур ўрганилади, терговни 3 нафар прокурор олиб боради.