Туркия Путин ва Зеленский Истанбулда учрашишига ишора қилди

Россия Президенти Владимир Путин ва Украина Президенти Владимир Зеленский уч раунд тўғридан тўғри Россия-Украина музокаралари бўлиб ўтган Истанбулда учрашиши мумкин. Бу ҳақда кеча, 27 август куни Туркия вице-президенти Жавдат Йилмаз “Haberturk” телеканали эфирида маълум қилди.

“Зеленский ва Путин Истанбулда учрашиши мумкин. Нега бўлмасин?” деди Йилмаз Туркия Президенти Ражаб Тойиб Эрдўғаннинг Украина можаросини ҳал қилиш борасидаги саъй-ҳаракатларини эслатиб.

Қайд этиш жоиз, Россия ва Украина вакиллари жорий йил давомида Истанбулда 3 марта – 16 май, 2 июнь ва 23 июль кунлари учрашган. Учрашувлар давомида томонлар маҳбусларни алмашиш, шунингдек, вазиятни ҳал қилиш бўйича меморандумлар версияларини алмашиш бўйича келишувга эришган.

“У [Эрдўған] икки томоннинг ишончига сазовор бўлган лидер. [Қора денгиз] ғалла ташаббуси, асирлар алмашинуви бўйича аниқ натижаларга эришилди. Туркия [Украина] можаросини ҳал қилиш учун доим муқобилдир”, деди Йилмаз.

Маълумот учун, 15 август куни Аляскада Россия Президенти Владимир Путин билан учрашув ва 18 августда Европа етакчиларининг Оқ уйга ташрифидан сўнг АҚШ Президенти Дональд Трамп Оқ уй Россия ва Украина Президентларининг шахсий учрашувига тайёргарлик кўра бошлаганини айтди. Бироқ Москва буни тасдиқламади ва музокаралар “даражасини ошириш”га розилик ҳақидаги баёнот билан чекланди.

Кўп ўтмай, Кремль вакиллари ўз баёнотлари билан Москванинг Украинага қўйган ультиматум талаблари ўзгармаганини кўрсатди. Кремль Путин ва Зеленский ўртасидаги учрашувни ўтказишни тўғридан тўғри рад этмади, бироқ у яқин келажакда учрашув ўтказмоқчи эмаслигини аниқ билдирди.

Шу фонда Трамп 22 август куни икки ҳафта ичида Москва ва Киевнинг кейинги ҳаракатларига қараб Украинадаги уруш бўйича “жуда муҳим қарор” қабул қилишини айтди. Бироқ, АҚШ Президенти таъкидлаганидек, у можаро тарафларига нисбатан санкциялар ёки тарифлар қўйиши ёки “ҳеч нарса қилмаслиги” мумкин.

Эслатиб ўтамиз, Украина Президенти Владимир Зеленский ҳам 26 август куни кечки видеомурожаатида Россия томони билан музокаралар Туркияда ўтказилиши мумкинлигини айтганди. Бунгача уларнинг учрашуви Венгрияда ўтказилиши мумкинлиги хабар қилинганди. Бироқ Зеленский буни рад этди. У Австрия, Швейцария ёки Туркияда учрашув ўтказишга рози, аммо Венгрия ёки Россияда эмас.