Туркия элчиси Ўзбекистондаги миссиясини якунламоқда

Бугун, 8 февраль куни Ташқи ишлар вазири Бахтиёр Саидов мамлакатда ўз вазифасини якунлаётган Туркиянинг Фавқулодда ва мухтор элчиси Олган Бекар билан учрашди. Бу ҳақда вазир ўзининг Telegram-каналида маълум қилди.

“Туркиянинг мамлакатимиздаги Фавқулодда ва Мухтор Элчиси Олган Бекар жаноблари билан учрашув ўтказдик. Раҳбарларимиз ўртасида ўрнатилган биродарлик ришталари ҳар бир соҳада яқин ҳамкорлик учун энг мустаҳкам пойдевор яратмоқда”, деб ёзган Саидов.

Шунингдек, вазир икки ўртадаги алоқаларни мустаҳкамлашда қўшган ҳиссаси учун Олган Бекарга ўз миннатдорчилигини билдирган.

“Қардошлик муносабатларини мустаҳкамлашга катта ҳисса қўшган жаноб Элчига самимий миннатдорлигимизни билдириб, келгуси фаолиятида муваффақиятлар тилаймиз”, деган у.

Маълумот учун, Олган Бекар 2021 йилнинг 5 март кунидан бошлаб Туркия Республикасининг Ўзбекистондаги Фавқулодда ва мухтор элчиси лавозимида ишлаб келаётган эди.

Эслатиб ўтамиз, жорий йилнинг 6 февраль куни Олган Бекар Тошкент шаҳар ҳокими Шавкат Умурзоқов билан учрашганди. Элчи қабул учун Умурзоқовга миннатдорлик билдириб, унинг Ўзбекистондаги дипломатик миссияси якунига етаётганини маълум қилган ҳамда аввал муҳокама қилинган масалалар – Турк мактабини кенгайтириш, Туркиянинг биринчи президенти Мустафо Камол Отатурк номини Тошкент кўчаларидан бирига бериш ҳамда Тошкент шаҳрида Турк боғини ташкил этиш бўйича ўз мулоҳазаларини билдирган.