Турк футболида яна можаро. Бу сафар ўйин биринчи таймда тўхтатилди (видео)

Туркия Суперлигаси доирасида кеча, 9 февраль куни “Rams Park” стадионида бўлиб ўтган “Галатасарой” - ”Адана Демирспор” ўйинида меҳмонлар биринчи таймнинг ярмида учрашувни давом эттиришдан бош тортди.

Маълум бўлишича, учрашувда аданаликлар ўйин пайтида ҳакамнинг қарорларидан норози бўлиб, тўсатдан баҳсни давом эттиришдан бош тортди ва майдонни тарк этди. Аниқроғи, 12-дақиқада Мората пенальтини аниқ амалга ошириб ҳисобни очди. Шундан кейин “Адана Демирспор” мураббийи шогирдларини йиғиб, футболчиларни кийиниш хонасига олиб чиқди. Ҳакам эса ўйинни тўхтатиш кераклигини эълон қилди.

Бу ҳолатга “Фенербахче” клуби расмий муносабат билан чиқди.

“Ноқонуний шартномаларингиз, қора бозор чипталари ва келишилган ўйинларингиз билан давлатимиз ва Туркия футбол федерациясини табриклаймиз. Манипуляция қилинган ОАВ ходимларингиз ва норасмий баёнотларингиз билан жамоатчиликни, йиллар давомида симулянт футболчиларингиз билан ҳакамлар ва футбол мухлисларини чалғитишда давом этинг. Ишонч ва адолат қолмади. Лекин ҳар доимгидек энг бегуноҳ ва жабрдийда ўзингиз. Турк футболига шунчалик зарар келтирганларинг билан табриклаймиз”, дейилади баёнотда.

Маълумот ўрнида, 2024 йилнинг 4 ноябрида Туркия Суперлигаси доирасида “Трабзонспор” - “Фенербахче” ўйинида мухлислар “Фенербахче” футболчилари ва мураббийини “буюмлар ёмғири” билан сийлаганди.