Туғуруқхонага қилинган ҳужумда 460 киши ҳалок бўлди

Суданнинг Эль-Фашир шаҳридаги туғуруқхонага қилинган ҳужумда 460 дан ортиқ бемор ва уларнинг ҳамроҳлари отиб ўлдирилди. Бу ҳақда Бирлашган Миллатлар Ташкилоти хабар берди.

Маълум қилинишича, бу воқеа ҳарбийлар сафига қўшилган исёнчилар томонидан 2000 дан ортиқ тинч аҳолининг ўлдирилганидан сўнг содир бўлган. Жаҳон соғлиқни сақлаш ташкилоти (ЖССТ) ушбу туғуруқхона “бир ой ичида тўртинчи марта ҳужумга учрагани, битта ҳамшира ҳалок бўлгани ва уч тиббиёт ходими яраланганини” маълум қилган. 

Хабарларга кўра, шифохонада 460 дан ортиқ бемор ва уларга ҳамроҳ бўлган одамлар отиб ўлдирилган. Шифохона ичидан олинган тасвирларда вайроналар орасида сочилиб ётган жасадлар акс этган. 

“Шифохонада операция пайтида кучли ўқ отиш бошланди. Бинога снаряд тушди. Бир аёлнинг очиқ яралари бор эди ва ҳамма менинг атрофимда югуриб юрган эди”, деган шифокорлардан бири. 

Олдинроқ ҳам ушбу туғуруқхона ва унга яқин ҳудудларда отишма содир бўлган. ОАВ жорий йилнинг 26-27 октябрь кунлари 2000 дан ортиқ қуролсиз тинч аҳоли ўлдирилгани, уларнинг аксарияти аёллар, болалар ва қариялар экани ҳақида хабар берган. Сунъий йўлдош тасвирларида оммавий қирғинлар далиллари кўрсатилган. 

Маҳаллий фаоллар томонидан эълон қилинган видеоларда жангарилар қуролсиз тинч аҳолини ерга ўтиришга мажбурлаб, уларни яқин масофадан ўлдираётгани ва битта видеода бола катталарни отиб ўлдиргани акс этган.

Ушбу ҳужумдан олдин ЖССТ Судандаги тиббиёт муассасаларига 185 та ҳужумни қайд этган. Ушбу ҳужумларнинг 49 таси фақат шу йилнинг ўзида содир бўлган ва 966 киши, асосан тиббиёт ходимлари ва беморларнинг ўлимига сабаб бўлган.

Эслатиб ўтамиз, жорий йилнинг бошида ҳам Судан ғарбида жойлашган Эль-Фашир шаҳридаги шифохонага Тезкор жавоб кучлари (ТЖК) дрони томонидан уюштирилган ҳужум оқибатида 70 дан ортиқ киши ҳалок бўлгани ҳақида хабар берилганди.