Трампнинг одами яна Путиннинг ҳузурига боради – ОАВ 

АҚШ Президенти Дональд Трампнинг куёви Жаред Кушнер ва махсус элчи Стив Уиткофф Россия Президенти Владимир Путин билан учрашиш учун Москвага боришни режалаштирмоқда. Бу ҳақда “Bloomberg” хабар берди.

Қайд этилишича, АҚШ ва Россия расмийларининг учрашуви жорий йил январь ойидаёқ бўлиши мумкин, аммо бу хабар ҳозирча расмий тасдиқланмаган ва Эрондаги тартибсизликлар сабаб вақт ўзгариши мумкин. 

Нашрга кўра, АҚШ расмийлари Путин ва унинг жамоасига тинчлик бўйича энг сўнгги таклифларни тақдим этади. Музокаралар АҚШ ва Европадан хавфсизлик кафолатлари, ҳамда Украина урушдан кейинги қайта қурилиши масалаларини қамраб олиши кутилмоқда. 

Бу хабар Трампнинг ушбу ой бошида Путин билан Украинадаги урушнинг давом этиши бўйича норозилиги ҳақида қилган изоҳларига тўғри келади. У ўшанда урушни тугатиш осон бўлишига умид қилаётганини таъкидлаганди.   

Маълумки, ўтган 2025 йилнинг 2 декабрь куни ҳам Кремль саройида Москва ва Вашингтон ўртасида Россия-Украина можаросини тинч йўл билан ҳал қилишга бағишланган музокаралар бўлиб ўтганди. Унда Владимир Путин, унинг ёрдамчиси Юрий Ушаков, Президентнинг махсус вакили Кирилл Дмитриев ҳамда АҚШ томонидан Стив Уиткофф ва Трампнинг куёви Жаред Кушнер иштирок этган эди.  

Эслатиб ўтамиз, аввалроқ Трампнинг Яқин Шарқ бўйича махсус вакили Стив Уитткофф Эрон сўнгги шоҳининг ўғли Ризо Паҳлавий билан яширин учрашув ўтказиб, Эронни қамраб олган норозилик намойишларини муҳокама қилгани ҳақида хабар берилган эди.