Путин Трампнинг одами билан 5 соат гаплашди (видео)

Кеча, 2 декабрь куни Кремль саройида Москва ва Вашингтон ўртасида Россия-Украина можаросини тинч йўл билан ҳал қилишга бағишланган музокаралар бўлиб ўтди. Бу ҳақда РБК хабар берди.

ОАВга кўра, учрашув деярли беш соат давом этган ва 3 декабрь куни Москва вақти билан 00:30 да якунланган.

Россия томонидан музокараларда Президент Владимир Путин, унинг ёрдамчиси Юрий Ушаков ва Президентнинг махсус вакили Кирилл Дмитриев иштирок этди.

АҚШ томонига Президент Дональд Трампнинг махсус вакили Стив Уиткофф ва Дональд Трампнинг куёви Жаред Кушнер вакиллик қилган. 

Учрашув чоғида АҚШ элчилари Путинга Украина билан бўлган музокаралардан сўнг янгиланган Вашингтоннинг тинчлик режасини тақдим этган.

Музокаралардан кейин Стив Уиткофф АҚШ элчихонасига борган. У матбуотга изоҳ бермаган. Кирилл Дмитриев эса ижтимоий тармоқда “самарали” деган ёзувни қолдирган холос. 

Кейинчалик Президент ёрдамчиси Юрий Ушаков музокараларнинг тафсилотларини маълум қилган. Унинг айтишича, Путин ва АҚШ вакиллари Кремлда “жуда фойдали, конструктив ва мазмунли” учрашув ўтказган, у деярли беш соат давом этган.

“Биз табиийки, америкалик ҳамкорлар билан улар бир муддат аввал Москвага топширган ҳужжатлар, лойиҳалар мазмунини муҳокама қилдик, уларга бирма-бир эътибор қаратдик”, деган Ушаков. 

Унга кўра, АҚШнинг дастлабки тинчлик режасидан ташқари Москва яна тўрт хил ҳужжат олган.

Ушаковнинг таъкидлашича, томонлар аниқ матнлар ёки формулировкаларни эмас, балки ҳужжатлардаги асосий мазмунни муҳокама қилган. 

“Баъзи таклифлар билан рози бўлишимиз мумкинлигини Президент америкалик суҳбатдошларига билдирди. Баъзиларига эса танқидий, ҳатто салбий муносабат билдирилди”, деган Ушаков. 

Унинг қўшимча қилишича, учрашувда “можарони ҳал этиш мумкин бўлмаган ҳудудий масалалар” ҳам аниқ муҳокама қилинган.

“Ҳозиргача мувофиқлаштирилган якуний қарор топилмади, лекин айрим таклифлар умумий жиҳатдан қабул қилиб бўладиган кўринишга эга. Уларни яна батафсил муҳокама қилиш керак. Баъзилари эса бизга мос эмас. Иш давом этади”, дея қўшимча қилган Ушаков. 

Унинг сўзларига кўра, Владимир Путин Стив Уиткофф орқали Дональд Трампга “дўстона салом” ва бир қатор муҳим сиёсий сигналлар етказган. Шунингдек, Россия ва АҚШ музокаралар мазмунини ошкор қилмасликка келишиб олган. 

Эслатиб ўтамиз, аввалроқ Украина Президенти Владимир Зеленский Франция Президенти Эммануэль Макрон билан музокаралар ўтказиш учун Парижга борганди. Ташриф АҚШ бошчилигида олиб борилаётган тинчлик музокаралари фонида амалга ошган.