Трампнинг одами Украина уруши қачон тугаши мумкинлигини айтди

АҚШ Президенти Дональд Трампнинг Яқин Шарқ бўйича махсус вакили Стив Уиткоффнинг айтишича, Россия Украина билан ўт очишни тўхтатиш бўйича таклиф берган ва унга жорий йилнинг сўнгига қадар эришилиши мумкин. Бу ҳақда у “Fox News”га берган интервьюсида сўз очди.

“Россияликлар тинчлик таклифини столга қўйди. У Донецкни ўз ичига олади. Балки бу украиналиклар қабул қиладиган нарса эмасдир, аммо бундай ютуққа ҳеч ким эришмаган. Бунга Трампнинг шахсий таъсири ва урушни тугатишга бўлган қатъий истаги сабаб бўлди. Энди биз уруш якуни яқинлашаётганини кўряпмиз”, деган АҚШ вакили. 

Унинг сўзларига кўра, шу ҳафта Нью-Йоркда Украина вакиллари билан учрашув ўтказилади. 

“Биз ҳар куни россияликлар билан гаплашяпмиз. Менимча, бу охир-оқибат Россия ва Украина Президентларининг юзма-юз учрашувига олиб келиши мумкин”, дея қўшимча қилган Уиткофф.

Шунингдек, у Трампнинг музокараларда бевосита иштирок этиши зарурлигини таъкидлаган. Уиткоффнинг эслатишича, Путин Аляскадаги саммитда “агар Трамп Президент бўлганида бу уруш бўлмаган бўларди” деганини тан олган.

“Стол устида тинчлик таклифи бор. У буни очиқ айтди ва мен у шу позицияда қолишига умид қиламан”, дея тушунтирган Стив Уиткофф. 

Шу билан бирга, у Украинанинг қарори муҳимлигини қайд этган. 

“Ер бериш масаласи энг мураккаб қарорлардан бири. Бу билан бирга хавфсизлик кафолатлари ҳам керак. Украиналиклар буни тушунишга мажбур”, деган у. 

Уиткофф сўзининг якунида жорий йилнинг охиригача тинчликка эришилиши мумкинлигини айтган. 

“Умид қиламизки, бу йил охирига қадар, балки ундан ҳам олдин якуний тинчлик келишуви бўйича барча зарур элементлар шаклланади”, дея ўз сўзларини тугатган АҚШ вакили. 

Эслатиб ўтамиз, аввалроқ Украина Президенти Владимир Зеленский Россия томони билан музокаралар Туркияда ўтказилиши мумкинлигини айтганди. Президентнинг сўзларига кўра, ҳамма нарса фақат дунё етакчиларининг, биринчи навбатда, АҚШнинг “Россияга босим ўтказиш” иродасига боғлиқ бўлади.