Трампнинг одами Путунни кўндириш учун Москвага боради

Келаси ҳафта АҚШ Президенти Дональд Трампнинг махсус вакили Стив Уиткофф Россия Президенти Владимир Путин билан учрашади. Бу ҳақда кеча, 25 ноябрь куни АҚШ Президентининг шахсан ўзи Air Force One бортида журналистларга берган интервьюсида сўз очди.

Трампнинг айтишича, унинг махсус вакили Стив Уиткофф келаси ҳафта Россия Президенти Владимир Путин билан учрашади. Америка раҳбари ўзининг куёви Жаред Кушнер ҳам тинчлик жараёнида иштирок этаётганини айтган ва у Уиткофф билан бирга Россияга бориши мумкинлигини истисно этмаган. 

“Стив Уиткофф, эҳтимол, Жаред билан бирга боради. Жаред борадими ёки йўқ аниқ эмас, аммо у келишув жараёнида иштирок этмоқда. У ақлли йигит ва улар Президент Путин билан келаси ҳафта Москвада учрашади”, деган АҚШ етакчиси. 

У келишувга эришиш учун қатъий муддат йўқлигини таъкидлаган.

Оқ уй раҳбарининг айтишича, Украина Президенти Владимир Зеленский АҚШга келмоқчи, бироқ аввал битим имзоланиши керак. Трамп суҳбатлар “яхши кетаётганини” қўшимча қилган.

Трамп 25 ноябрь куни Путин билан музокаралар учун ўзининг махсус вакилини Москвага юборишини билдирган. Шу билан бир вақтда АҚШ Армия вазири Дэниел Дрисколл Украина томони билан алоқада бўлиши айтилди. 

Украина Президенти офиси раҳбари Андрей Ермак Дрисколл билан мулоқот қилгани ва уни Киев ҳам кутаётганини айтди.

“Bloomberg” хабарига кўра, Уиткофф Россия Президентининг ёрдамчиси Юрий Ушаков билан тинчлик режаси бўйича телефон орқали суҳбатлашган.

Дрисколл аввалроқ Киевга келиб, Трамп маъмуриятининг 28 бандлик тинчлик режасини тақдим этган эди. 23 ноябрь куни Женевада АҚШ ва Украина ўртасидаги музокаралардан сўнг режа сезиларли даражада ўзгартирилди. “Politico” маълумотларига кўра, режанинг таркибидан ҳудудларга оид бандлар, жумладан, Донбассни Россияга бериш масаласи чиқариб ташланган. Ермакнинг айтишича, ҳудудий ён беришлар масаласини Зеленский Трамп билан шахсан муҳокама қилмоқчи.

Зеленский Трамп билан учрашишга тайёр экани, аммо Европа ҳамкорлари ҳам музокарада қатнашиши зарурлигини айтган. Унинг маълум қилишича, учрашув “имкон қадар тез” бўлиши керак.