Трампни йўқ қилиш учун ўсмир ўзининг ота-онасини ўлдирди

АҚШнинг Висконсин штатида яшовчи ўсмир мамлакат раҳбари Дональд Трампни ўлдириш мақсадида ота-онасининг пулларига эга бўлиш илинжида уларни ўлдирди. Бу ҳақда CNN хабар берди.

Тергов маълумотларига кўра, қўшалоқ қотиллик кейинги сиёсий суиқасдга тайёргарлик кўриш мақсадида содир этилган. Расмийларнинг фикрича, ўсмир АҚШ раҳбари Дональд Трампни ўлдириш ва Америка ҳукуматини ағдариш режасини амалга ошириш учун пул олиш ва эркинликка эришиш мақсадида содир этилган.

Қотиллик жорий йилнинг 11 февраль куни Висконсин штатидаги Уокешо шаҳрида амалга оширилган. 1 март куни шериф идораси ўринбосарлари 35 ёшли Татьяна Касап ва 51 ёшли Дональд Маернинг жасадини топган. Март ойида Никита Касап Канзасда қўлга олинган. У ўлдирилган ўгай отасининг машинасини бошқарган ва ёнида ўқотар қурол ва 14 минг доллар нақд пул бўлган.

Ўсмирни қўлга олишдан олдин у Иллинойс, Айова, Небраска, Вайоминг ва Колорадо штатларининг чегараларини кесиб ўтган. Уни қўлга олган полиция ходимлари ўғирланган автомашина ичидан ўсмирнинг ўгай отасига тегишли қурол, ўқ-дорилар ва сарфланган снарядлар, 14 минг доллар миқдоридаги нақд пул, онасининг шу қийматдаги заргарлик буюмлари, шунингдек, жабрланувчиларнинг ҳайдовчилик гувоҳномаларини топган.

Тергов доирасида унинг Украина ва Россияда жойлашгани тахмин қилинган фойдаланувчилар билан алоқалари таҳлил қилинди. Хабарлардан бирида у чет элга кетишдан олдин қанча вақт яшириниши кераклигини сўраган, шунингдек, Украинага кўчиб ўтиш имкониятини муҳокама қилган.

ABC телеканалининг суд ҳужжатларига таяниб хабар беришича, Касапнинг асосий мақсади Трампни ўлдириш бўлган. Касап Трампни “ҳукмрон режим рамзи” деб ҳисоблаган ва унинг лавозимидан четлатилиши сиёсий инқирозни келтириб чиқаришига умид қилган.

Терговга кўра, Касап неонацистлар гуруҳининг “Тўққиз бурчак ордени” билан боғлиқ бўлиб, у сатанизм, неонацизм ва анархизм элементларини бирлаштирган. Бу гуруҳ зўравонлик, ирқий уруш ва давлат тузилмаларини йўқ қилишга чақиради. ФҚБнинг маълум қилишича, Касап дрон ва портловчи моддалардан масофадан фойдаланишни тадқиқ қилган, асбоб-ускуналарга буюртма берган ва унинг нархини қисман ўзи тўлаган.

Касапга бир нечта айбловлар қўйилган: биринчи даражали икки кишини ўлдириш, жасадларни яшириш, 10 минг доллардан ортиқ мол-мулкни ўғирлаш, сохта ҳужжатлардан фойдаланиш, АҚШ Президентига суиқасд уюштириш ва оммавий қирғин қуролидан фойдаланишга уриниш.

Дастлабки суд мажлиси 2025 йилнинг 9 апрель куни бўлиб ўтди. Кейингиси эса 7 майга белгиланган. Гумонланувчи ҳибсда, гаров пули 1 миллион доллар қилиб белгиланган. У иш бўйича расмий баёнот бермаган ва айбини тан олмаган. 

Дональд Трампга суиқасд

north_east

Эрон Трампга суиқасд уюштирмаслигини ёзма тасдиқлаган – WSJ

2024 йилнинг 13 июль куни ҳам Пенсильвания штатининг Бутлер шаҳрида 20 ёшли Томас Мэтью Крукс Дональд Трамп билан митинг ўтказилаётган жой яқинидаги бинонинг томига чиқиб, ўт очишга муваффақ бўлганди. Крукс бир неча марта ўқ узишга муваффақ бўлганидан кейингина отишмачи полиция снайпери томонидан ўлдирилган.

Ўқлардан бири Дональд Трампнинг қулоғига тегиб, митинг иштирокчиларидан бири ҳалок бўлганди, яна икки нафари яраланганди.

Ушбу воқеадан ўн кун ўтиб, АҚШ махфий хизмати раҳбари Кимберли Читл истеъфога чиқди.

Иккинчи уриниш 15 сентябрь куни Флоридадаги гольф клубида содир бўлди. 58 ёшли Райан Уэсли Рут ўша пайтда гольф ўйнаётган Трампга милтиқни панжарадан ўтказди. Тергов давомида прокуратура, унинг фикрича, Трампга режалаштирилган суиқасд фактини тасдиқловчи далилларни тақдим этди. Гумонланувчининг “Дональд Трампга суиқасд уюштиришга уриниш”га ишора қилган хати, шунингдек, Трамп нутқлари саналари ва жойларининг қўлёзма рўйхати топилди.

Ҳужум қилгани тахмин қилинаётган шахс ҳозирча ўз айбини тан олмади. Адвокатлар уни гаров эвазига қўйиб юборишга уриниб кўришди. Уни умрбод қамоқ жазоси кутмоқда.