Трамп Эрдўғандан Украина музокараларига воситачилик қилишни сўради

АҚШ Президенти Дональд Трамп Туркия етакчиси Ражаб Тойиб Эрдўғанга мурожаат қилиб, Украинадаги можарода воситачилик қилишни сўради. Бу ҳақда “Hurriyet” нашри хабар берди.

Маълум қилинишича, Эрдўған АҚШдан Ғазо секторида ўт очишни тўхтатишда ёрдам беришни сўраган.

Расмий равишда Туркия Президенти маъмурияти Ражаб Тойиб Эрдўған ва Дональд Трамп Украина можаросини ҳал қилишда биргаликдаги саъй-ҳаракатлар тўғрисида келишиб олганини маълум қилган. Эрдўған музокараларнинг ўзини самарали деб атаган.

“Hurriyet” нашрининг ёзишича, Дональд Трамп Эрдўғаннинг Россия Президенти Владимир Путин билан ҳам, Украина Президенти Владимир Зеленский билан ҳам мулоқот олиб бориш қобилиятини қайд этган. Шу муносабат билан Трамп туркиялик мавқедошига воситачилик қилишни таклиф қилган. Аммо Туркия раҳбарининг бу илтимосга жавоби маълум қилинмаган.

Маълумот учун, Туркия раҳбарининг Украина ва Россия етакчилари билан муносабати Трамп ўйлаганидек жуда самимий ва дўстона. Масалан, жорий йилнинг 18 февраль куни Туркия Президенти Ражаб Тойиб Эрдўған Украина раҳбари Владимир Зеленский билан учрашган эди. Қолаверса, икки томонни ҳам ҳурмат қилган Эрдўған  28 март куни Россия Президенти Владимир Путин билан телефон орқали мулоқот қилган эди. Икки суҳбатда ҳам асосий мавзу сифатида Украинадаги вазият муҳокама қилинган.

Эслатиб ўтамиз, жорий йилнинг 5 май куни Туркия Президенти Ражаб Тойиб Эрдўған америкалик мавқедоши Дональд Трамп билан мулоқот қилган эди. Суҳбат чоғида Трамп ва Эрдўған билан Украина масаласини муҳокама қилган ва Туркия етакчиси АҚШнинг можарони тугатиш ёндашувини қўллаб-қувватлаган. Қолаверса, Эрдўған Трампни Туркияга, Трамп эса уни Вашингтонга таклиф қилган. Суҳбат чоғида АҚШ ва Эроннинг музокаралар жараёнини юқори баҳолаган. Икки ўртадаги мулоқотда Сурия ва Ғазо масалалари ҳам айро бўлиб қолгани йўқ.