Трамп жаҳон бозорларини “портлатиб”, АҚШ акцияларини қулатди

АҚШ Президенти Дональд Трампнинг мамлакатга кирадиган барча товарларга бож солиш ва Қўшма Штатларнинг энг йирик савдо ҳамкорларига алоҳида тарифлар жорий этиш ҳақидаги қарори пандемиядан бери кузатилмаган даражадаги АҚШ фонд бозорининг қулаши билан якунланди. Бу ҳақда “The Wall Street Journal” хабар берди.

Кеча, 3 апрель кунги савдо бошида S&P 500 индекси 4 фоиздан кўпроққа, Nasdaq – 4,9 фоиз, Dow Jones – 3,7 фоизга, кичик капитализацияли компанияларни ўз ичига олган Русселл 2000 индекси эса деярли 7 фоизга қулади. 

“Савдо бошланганидан бир соатдан бироз кўпроқ вақтда АҚШнинг энг йирик компаниялари акциялари 2 триллион долларга арзонлашган. АҚШ бозорининг умумий капитализацияси 2,7 триллион долларга камайган – бу 2020 йилдан бери энг йирик кўрсаткич”, дейилади хабарда.

Apple акциялари ҳам 9,5 фоизга тушиб кетди. Бунга компаниянинг заводлари энг кескин тарифларга дучор бўлган Хитойда жойлашгани сабаб бўлди. Оқибатда компания қиймати 300 миллиард долларга камайди. Хитой маҳсулотларига тўла бўлган Target ва Dollar Tree чакана савдо тармоғи акциялари 12 фоиздан ортиқ қулади. Amazon капитализацияси 165 миллиард долларга, Nvidia’ники эса 183 миллиард долларга камайди.

“The New York Times” нашрига кўра, Трампнинг энг йирик донорларидан айримлари миллиардлаб зарар кўрган: Tesla акциялари қулашидан Илон Маск 6 миллиард доллар йўқотган бўлса, Blackstone Group инвестиция фонди раҳбари Стивен Швартсман 3 миллиард доллар йўқотган.

Сўнгги уч йилдаги энг катта пасайишни нефть бозори бошдан кечирган: Brent маркали нефть фьючерслари 7 фоиз арзонлашиб, баррели 70 доллардан пастга тушган. Москва фонд биржаси индекси 2,3 фоизга пасайган ва кетма-кет 12-кун манфий кўрсаткич билан ёпилган – бу замонавий Россия тарихида биринчи марта кузатилмоқда.

Маълумотларга кўра, бож тарифлари ҳажми кутилганидан анча юқори бўлиб чиққан. Хусусан, Оқ уй ҳисоб-китобларига бўйича улар келаси 10 йил ичида АҚШ бюджетига 6 триллион доллар олиб келади ва 2024 йилда мисли кўрилмаган 3 триллион долларга етган бюджет тақчиллигини қисқартиради. 2025 йилда эса бу кўрсаткич ўтган йилги рекордларни янгилаши кутилмоқда. JP Morgan таҳлилчиларига кўра, бу Трампнинг қарори 1960 йиллар охиридан буён АҚШда энг йирик солиқ ислоҳоти бўлиб, бюджетни тўлдириш эвазига АҚШ ва Европа Иттифоқида рецессия, жаҳон бўйича эса стагфляцияга олиб келиши мумкин.

Эслатиб ўтамиз, 2 апрель оқшомида Оқ уй боғида чиқиш қилган Трамп АҚШга импорт қилинадиган маҳсулотларнинг аксарига 10 фоизлик тарифлар, Хитой учун эса қўшимча 34 фоизлик, Европа Иттифоқи учун эса 20 фоизлик божлар жорий этилишини эълон қилди. Оқибатда АҚШнинг импорт бўйича ўртача бож ставкаси 2024 йилдаги 2,5ф оиздан 22 фоизга ошди – бу кўрсаткич охирги марта 1910 йиллар атрофида кузатилган.

Еврокомиссия раҳбари Урсула фон дер Ляйен Европа Иттифоқи Трамп тарифларига жавобан қарши чоралар пакетини тайёрлаётганини билдирди. Хитой эса АҚШ томонидан жорий этилган тарифларга “кескин қарши” эканини билдириб, ўз манфаатлари ва ҳуқуқларини ҳимоя қилиш учун “жавоб чораларини кўради”, дея огоҳлантирди. Яна бир қанча Европа давлатлари Трампинг бу қарорига норозилик билдирди.