Трамп Зеленскийга урушни бир ой ичида тугатиш кераклигини айтган – ОАВ

АҚШ Президенти Дональд Трамп Украина раҳбари Владимир Зеленский билан телефон орқали суҳбатда имкон қадар тезроқ тинчликка эришмоқчи эканини билдирган. Бу ҳақда украиналик амалдор ва суҳбатдан хабардор икки манбага таяниб, “Axios” нашри хабар берди.

Манбалардан бирининг айтишича, Зеленский уруш 2026 йилда якунланишига умид билдирган. Трамп эса можаро аллақачон ҳаддан ташқари чўзилиб кетганини айтиб, унинг бир ой ичида тугашини исташини маълум қилган.

Украиналик амалдор сўзларига кўра, Трамп Россия билан эҳтимолий тинчлик келишуви доирасида АҚШ томонидан Украинага муҳим хавфсизлик кафолатлари беришга тайёрлигини ҳам тасдиқлаган.

Суҳбатда АҚШ Президентининг махсус вакили Стив Уиткофф ҳамда унинг куёви Жаред Кушнер ҳам иштирок этган.

Зеленский уларнинг 26 февраль куни Женевада ўтказиладиган икки томонлама учрашувда муҳокама қилинадиган масалаларни кўриб чиққанини, шунингдек март ойи бошида уч томонлама форматда музокара гуруҳларининг навбатдаги тўлиқ таркибдаги учрашувига тайёргарлик масалалари муҳокама қилинганини айтган. У мазкур учрашув етакчилар даражасидаги музокараларга ўтиш имконини беришига умид билдирган

Уиткофф эса Россия, Украина ва АҚШ ўртасидаги уч томонлама музокараларнинг янги босқичи яқин ўн кун ичида ўтказилиши мумкинлигини маълум қилган. 

Эслатиб ўтамиз, аввалроқ Украина Президенти Владимир Зеленский Россия томонидан бошланган кенг кўламли урушнинг тўрт йиллиги муносабати билан халққа видеомурожаат йўллаганди. Зеленский нутқи давомида урушнинг илк кунлари, халқнинг танлови, оғир йўқотишлар ва тинчлик масаласи ҳақида кўплаб баёнотлар берган. Президент дастлаб ушбу тарихий санани эслаган. Унинг таъкидлашича, ўша кунларда кўпчилик Украина тез таслим бўлади, деб ўйлаган. Аммо украиналиклар бошқача йўлни танлаган.