Трамп яна янги божлар эълон қилди

Кеча, 13 апрель куни АҚШ Президенти Дональд Трамп келаси ҳафта яримўтказгичлар импортига янги божлар жорий этишини эълон қилди. Бу ҳақда Оқ уй раҳбари Air Force One самолёти бортида журналистлар билан бўлиб ўтган навбатдаги учрашувда сўз очган.

Маълум қилинишича, Президент Қўшма Штатларга ушбу маҳсулотларни олиб кирганлар қандай ставкаларда солиққа тортилиши ҳақида аниқлик киритмаган, фақат божлар миқдори ишлаб чиқарувчига қараб фарқ қилиши айтилган.

Трампнинг сўзларига кўра, бу масалада мослашувчанлик кўрсатиш керак.

“Биз ўз чипларимиз, яримўтказгичлар ва бошқа товарларимизни мамлакатимизда ишлаб чиқармоқчимиз”, дея айтиб ўтган Трамп.

Бундан ташқари, Трамп ўзининг Truth Social ижтимоий тармоғида яримўтказгичлар ва бошқа компонентлар импорти бўйича миллий хавфсизлик нуқтаи назаридан текширув ўтказишни буюришини маълум қилган.

“Биз миллий хавфсизлик тарифлари бўйича бўлажак текширувларда яримўтказгичлар ва бутун электроника таъминоти занжирини кўриб чиқмоқдамиз”, дея ёзади Оқ уй раҳбари.

“Reuters”нинг ёзишича, яримўтказгичларга янги божлар ушбу маҳсулотнинг асосий ишлаб чиқарувчилари бўлган Шарқий Осиё мамлакатлари билан савдо урушининг янада кучайишига, шунингдек, Америка технология компаниялари учун узоқ муддатли оқибатларга олиб келади.

Маълумот учун, яримўтказгичлар электроника ва микроэлектроникада жуда кенг қўлланилиб, замонавий электр жиҳозларнинг деярли ҳаммаси – компьютерлардан тортиб, то уяли алоқа телефонларигача барчаси яримўтказгичли технологияга асосланган. Энг кенг қўлланадиган яримўтказгич модда кремний саналади.

Эслатиб ўтамиз, аввалроқ 130 давлат АҚШ маъмурияти билан боғланиб, тарифлар бўйича музокаралар олиб бориш истагини билдирганди.