4-қўнғироқ. Трамп ва Путин “Ўргимчак тўри”ни муҳокама қилди

Бугун, 4 июнь куни АҚШ Президенти Дональд Трамп Россия Президенти Владимир Путин билан телефон орқали мулоқот қилди ва унда Украина томонидан Россиядаги аэродромларга уюштирилган ҳужумларни муҳокама қилди. Бу ҳақда Трамп ўзининг Truth Social тармоғида ёзиб қолдирди.

Трампнинг ёзишича, улар Украина можаросини тартибга солиш ва Россия ҳарбий аэродромларига қилинган ҳужумларни муҳокама қилган.

Унинг сўзларига кўра, суҳбат самарали бўлган ва тахминан 1 соат 15 дақиқа давом этган.

“Бу яхши суҳбат бўлди, лекин зудлик билан тинчликка олиб келадиган суҳбат эмас”, дея ёзган Трамп.

Оқ уй раҳбарининг қўшимча қилишича, Владимир Путин унга “яқинда аэродромларга қилинган ҳужумга жавоб беришга тўғри келишини” билдирган.

“Путин Украинанинг яқинда Россия аэродромларига уюштирган ҳужумига жавоб беришга мажбур бўлишини жуда қатъий қилиб айтди”, дея ёзган АҚШ раҳбари.

Қолаверса, Америка Президенти суҳбат давомида томонлар Эроннинг ядровий дастури билан боғлиқ вазиятни муҳокама қилганини ёзган.

“Путин Эрон билан музокараларда иштирок этишни таклиф қилди ва бу масалани тезроқ ҳал қилишда ёрдам бериши мумкинлигини айтди”, дея билдирган АҚШ раҳбари.

Украинанинг “Ўргимчак тўри”

Украина 1 июнь куни Россия ҳарбий аэродромларига учувчисиз дронлар ёрдамида амалга оширилган йирик ҳужум – “Ўргимчак тўри” операциясини ўтказди. Украина Президенти Владимир Зеленский мурожаатида операциясида иштирок этганларга миннатдорлик билдирди. Украина хавфсизлик хизмати (УХХ) “Ўргимчак тўри” операцияси давомида Россия стратегик авиация самолётларининг 34 фоизи зарар кўрганини маълум қилди. Киевнинг ҳисоб-китобларига кўра, зарар кўрган самолётнинг тахминий умумий қиймати 7 миллиард долларни ташкил қилади. Манбалар Россиянинг 41 та самолётига, жумладан, стратегик А-50, Ту-95 ва Ту-22М3 самолётларига зарар етказилгани ҳақида хабар берган. Киевга кўра, улардан мунтазам равишда Украина шаҳарларига ҳужум қилиш учун фойдаланилган. Операция бир ярим йил давомида тайёрланган.

Зеленскийнинг позицияси

Украина Президенти Владимир Зеленский Россияга етказилган йўқотишлар ва уларнинг ҳарбий салоҳиятининг камайиши мамлакатни чинакам дипломатияга қайтишга мажбур қилиши керак, деб ҳисоблайди. Буни у “Ўргимчак тўри” операциясидан кейин берган баёнотида ҳам айтиб ўтди.

“Европа ва АҚШ Россияга қараганда яхшироқ қуролларга эга. Шунингдек, бизда кучлироқ тактик қарорлар бор. Бизнинг “Ўргимчак тўри” операциямиз буни исботлади. Россия йўқотишлар нимани англатишини тушуниши керак. Айнан мана шу уни дипломатияга ундайди”, деган Зеленский.

Хуллас, Зеленский томонидан абжирона тайёрланган “Ўргимчак тўри” ўз вазифасини ўтади. Украина Россияга қисман бўлса-да, йўқотишлар нима эканини сездирди.