Трамп ва Мерц Украина масаласида ҳамкорлик қилишга келишиб олди

Кеча, 8 май куни Германиянинг янги канцлери Фридрих Мерц АҚШ Президенти Дональд Трамп билан биринчи марта қўнғироқлашди ва Украина бўйича фикр алмашди. Бу ҳақда “Tagessachu” хабар берди.

Маълум қилинишича, суҳбат чоғида Мерц Оқ уй раҳбарини Германияга, Трамп эса ўз навбатида канцлерни Вашингтонга таклиф қилган.

Ярим соатга яқин давом этган суҳбатнинг асосий қисми Украинадаги уруш масаласига бағишланган. Германия ҳукумати вакили Штефан Корнелиуснинг маълум қилишича, Германия ва АҚШ Россия ҳарбий боқинини тўхтатиш мақсадида яқин ҳамкорлик қилишга келишиб олган. Трамп ва Мерц Россия музокараларга майдонни бўшатиш учун ўт очишни тўхтатишга рози бўлиши керак, деган фикрга келган.

Мерц ва Трамп, шунингдек, мамлакатлар ўртасидаги савдо келишмовчиликларини имкон қадар тезроқ ҳал қилиш кераклигини таъкидлаган.

Умуман олганда, янги канцлер урушни тўхтатиш учун фаол ҳаракат қилмоқда. Масалан, у жорий йилнинг 7 май куни Франция Президенти Эммануэль Макрон билан Украинада тинчлик ўрнатиш масалаларини муҳокама қилган. Германия канцлерининг сўзларига кўра, европаликлар уруш майдонида АҚШнинг ўрнини боса олмайди.

Шунингдек, канцлер Трамп билан суҳбатда Германия АҚШ раҳбарлиги остида ва иштирокида ўт очишни тўхтатиш режимига риоя этилишини назорат қилишда иштирок этишга тайёрлиги ҳам айтиб ўтган.

Эслатиб ўтамиз, жорий йилнинг 5 май куни Берлиндаги Бендлерблок ҳарбий мажмуаси ҳовлисида Германия канцлери Олаф Шольц билан видолашув маросими бўлиб ўтган эди. Анъанавий “Буюк оқшом шон-шуҳрати” маросимида сўзлаган Шольц ҳамжиҳатликка, демократик қадриятларни асраб-авайлашга чақирган. 6 май куни эса Бундестаг овоз беришнинг иккинчи босқичида Христиан-демократик иттифоқ раҳбари Фридрих Мерцни Германия канцлери этиб сайлаганди. Мерц сайланиши учун 316 овоз керак эди, у биринчи босқичда 310 та овоз, иккинчи босқичда эса 325 овоз олди.