Трамп Украинани қоралашини кутгандик – Песков

Кремль АҚШдан Украина Қуролли кучлари томонидан Россия аэродромларига уюштирилган ҳужумларга нисбатан қатъий қораловчи баёнот эшитишни кутган эди. Бу ҳақда Россия Президенти Владимир Путиннинг матбуот котиби Дмитрий Песков журналистларга берган интервьюсида сўз очди.

Песковнинг таъкидлашича, Россия бу каби ҳарбий ҳужумларга АҚШ томонидан аниқ ва принципиал баҳо берилишини умид қилган. Бироқ ҳозирча бундай муносабатни кузатмаган.

Кремль вакили АҚШдан халқаро хавфсизликка таҳдид солувчи ҳаракатларга, хусусан, Россия ҳудудидаги ҳарбий объектларга қилинган ҳужумларга нисбатан очиқ ва кескин позиция билдиришини кутаётганини қайд этган.

“Кеча бўлиб ўтган телефон суҳбатида АҚШ Президенти ҳақиқатдан ҳам “Киев режими” томонидан бу террорчилик ҳаракати тайёрлангани ҳақида ҳеч қандай маълумотга эга бўлмаганини айтди. Аммо агар халқаро баҳолаш ҳақида гапирадиган бўлсак, албатта, биз энг камида бу террорчилик ҳаракати бўйича қатъий қораловчи фикр эшитишни афзал кўрган бўлардик”, деган Песков.

Эслатиб ўтамиз, кеча, 4 июнь куни АҚШ Президенти Дональд Трамп Россия Президенти Владимир Путин билан телефон орқали мулоқот қилди ва унда Украина томонидан Россиядаги аэродромларга уюштирилган ҳужумларни муҳокама қилди. Трампнинг ёзишича, 1 соат 15 дақиқа давом этган суҳбат давомида Владимир Путин унга “яқинда аэродромларга қилинган ҳужумга жавоб беришга тўғри келишини” билдирган.