Трамп украиналикларга уруш тугагунча АҚШда қолишга рухсат берди

Украиналик қочқинлар ватанида жанговар ҳаракатлар тугагунча АҚШда қолишлари мумкин. Бу ҳақда бугун, 30 июль куни АҚШ Президенти Дональд Трамп журналистларга берган интервьюсида маълум қилди.

Трампдан украиналик қочқинларга уруш тугагунча АҚШда қолишга рухсат бериладими, дея сўралган.

“Биз буни қиламиз. Бизда Украинадан келган кўп одамлар бор ва биз улар билан ишлаяпмиз”, деган Оқ уй раҳбари. 

Дональд Трамп АҚШ Президенти постига қайтгач, анти-мигрант сиёсатини қаттиқ олиб бормоқда. Инаугурациядан сўнг у аввалги президент Жо Байден томонидан йўлга қўйилган “Украина учун бирлик” (United for Ukraine, U4U) дастурини тўхтатган эди. Ушбу дастур украиналиклар ва уларнинг яқин қариндошлари учун молиявий ҳомийлар мавжуд бўлган тақдирда икки йил давомида АҚШда вақтинча қолиш имконини берган. ОАВ маълумотига кўра, 2023 йилнинг сентябрига келиб 150 мингдан ортиқ киши унинг иштирокчисига айланган.

“Reuters” хабарига кўра, Трамп маъмурияти Байденнинг гуманитар дастурлари орқали АҚШга кирган 240 мингга яқин украиналикнинг вақтинчалик ҳуқуқий мақомини бекор қилишни режалаштирган. Бироқ Оқ уй бу маълумотни рад этиб, уни “фейк хабар” деб атаган.

Май ойида “The Washington Post” нашри Трамп маъмурияти чет эл ёрдами учун ажратилган 250 миллион долларгача маблағни қочқинларни, жумладан, 200 минг украиналикни депортация қилиш учун сарфлашни режалаштиргани ҳақида ёзди. 

Эслатиб ўтамиз, жорий йилнинг 6 июнь куни АҚШнинг Лос-Анжелес шаҳрида маҳаллий аҳоли федерал агентларнинг иммиграция қонунларини қўллаш операциясига қарши чиқиб, норозилик намойишларини бошлаганди. Бунинг ортидан эса шаҳарга 2000 нафар Миллий гвардия ходимларини киритиш буюрилганди.