Лос-Анжелесда тўполон: аҳоли иммиграция сиёсатига қарши бош кўтарди (видео)

Жорий йилнинг 6 июнь куни АҚШнинг Лос-Анжелес шаҳрида маҳаллий аҳоли федерал агентларнинг иммиграция қонунларини қўллаш операциясига қарши чиқиб, норозилик намойишларини бошлади. Бунинг ортидан эса шаҳарга 2000 нафар Миллий гвардия ходимларини киритиш буюрилди. Бу ҳақда “The Wall Street Journal” хабар берди.

Қайд этилишича, намойишчилар баъзи кўчаларни тўсиб қўйган, шунингдек, полиция билан тўқнашувлар юз берган. Ҳуқуқ-тартибот органлари кўздан ёш оқизувчи газ ва шовқинли гранаталардан фойдаланган, аҳоли бунга мушаклар билан жавоб қайтарган. 6 июнь кунги тўқнашувларда камида бир киши жароҳат олган.

АҚШ Ички хавфсизлик департаментининг маълум қилишича, Лос-Анжелесдаги федерал ҳуқуқни муҳофаза қилиш идораси биносига ҳужум бўлган. Калифорния прокуратураси ўнлаб намойишчилар ҳибсга олинганини эълон қилиб, бу жараён давом этиши мумкинлиги ҳақида огоҳлантирган.

Мамлакат Президенти Дональд Трамп эса Лос-Анжелесда иммиграция сиёсатига қарши норозилик намойишлари авж олаётгани ортидан шаҳарни “мигрантлардан озод қилишини” эълон қилди. У бу баёнотни кеча, 8 июнь куни Truth Social'даги саҳифасида ёзди, шундан сўнг у шаҳарга Миллий гвардия кучларини юборди.

“Бир пайтлар буюк бўлган Америка шаҳри – Лос-Анжелес ноқонуний мигрантлар ва жиноятчилар томонидан босиб олинган. Энди эса исёнкор ва тажовузкор оломон бизнинг федерал агентларимизга ҳужум қилмоқда, депортация операцияларига халақит беришга уринмоқда. Мен Лос-Анжелесни мигрантлар босқинидан озод қилиш ва бу мигрантлар исёнини тугатиш учун барча зарур чораларни кўришни буюрдим”, деб ёзди Трамп.

Хусусан, у Лос-Анжелесга 2000 нафар Миллий гвардия ходимини юбориш ҳақида қарор чиқарди. Улар вақтинча иммиграция ва божхона хизматлари агентлари, давлат хизматчилари ҳамда федерал мулкни ҳимоя қилади.

Маҳаллий ҳукумат, айниқса, Калифорния губернатори, демократ Гэвин Ньюсом Трампнинг бу қарорига кескин қарши чиққан ва уни “атайин намойишни қўзғатишга уриниш” деб атаган. Шунга қарамай, кеча, 8 июнь куни Миллий гвардия аскарлари штатга келишни бошлаган.

Эслатиб ўтамиз, аввалроқ АҚШ Олий суди Дональд Трампга 500 мингдан ортиқ муҳожирни ҳуқуқий мақомидан маҳрум қилиш ҳуқуқини бергани хабар қилинганди. Унга кўра, Куба, Гаити, Никарагуа ва Венесуэладан келиб, Жо Байден даврида махсус гуманитар дастурлар асосида АҚШда вақтинча яшаш ҳуқуқига эга бўлган мигрантлар энди бу мақомдан маҳрум қилиниши мумкин.