Трамп Туркиядан ҳарбий самолётда яширинча “қочди”

АҚШ Президенти Дональд Трамп жорий йилнинг июль ойи бошида Эрон билан боғлиқ таҳдид туфайли Туркия пойтахти Анқарадан ҳарбий-транспорт самолётида яширинча учиб кетган. Бу ҳақда “The Washington Post” газетаси хабар берди.

Гап шундаки, жорий йилнинг 7-8 июль кунлари Туркия пойтахти Анқара НАТО давлатлари раҳбарларининг саммитига мезбонлик қилди. Саммит баҳонасида расмий ташрифни ҳам амалга оширган Трамп, 7 июль куни Анқарага тилларда достон бўлган янги самолётида келганди. Ўшанда самолёт Қатар Амири томонидан совға қилингани ва унинг тахминий бозор қиймати 900 миллион доллар атрофида экани айтилганди. Бироқ, Трамп 9 июль куни мамлакатни ўзининг янги ҳашаматли самолётида эмас, балки United Airlines компанияси бортига, ўзининг эски самолётига чиқиб кетаётгани суратлар тарқалди. 

“The Washington Post”нинг ёзишича, гарчи Оқ уй Америка етакчиси ўз лайнерида учиб кетганини даъво қилган бўлса-да, аслида Трамп суиқасд уюштирилиши таҳдиди сабабли ҳарбий самолётда Туркиядан яширинча учиб кетган.

Бу аввалдан келишилган махсус ҳарбий операция бўлиб, бу ҳақда журналистлар ва Оқ уйнинг айрим ходимларига хабар берилмаган. Улар Президент билан бир самолётда учяпмиз, деб ўйлашган.

Трамп Анқарада бўлиб ўтган НАТО саммити якунларига бағишланган матбуот анжуманида Туркиядан Қатар қироллик оиласи совға қилган янги президентлик бортида қайтмаслигини, чунки уни Европада намойиш этмоқчи эканини маълум қилган. Нашрнинг қайд этишича, Трамп Анқарада ўзининг эски президентлик авиалайнери бортига кўтарилган, буни журналистлар ҳам кўриб, видеога муҳрлаган. Бироқ манбаларнинг сўзларига кўра, бир неча дақиқадан сўнг у яширинча АҚШ Ҳарбий-ҳаво кучларининг кичикроқ самолёти – C-32A ҳарбий-транспортига ўтказилган. Мақоладан маълум бўлишича, Трампни самолётгача кичик юк машинасида олиб кетишган. Бундай машинадан одатда самолётлар парвозидан олдин озиқ-овқат маҳсулотларини юклашда фойдаланилади.

Нашрнинг АҚШ расмийлари орасидаги манбаси потенциал тажовузкорларни чалғитиш амалиёти Трампга Эрон томонидан бўлаётган ҳақиқий таҳдид билан боғлиқлиги сабабли ўтказилганини айтган. Ёзилишича, АҚШ ҳукуматида ўнлаб йиллардан буён Эроннинг америкалик мансабдор шахсларга нисбатан терактлар уюштириш фитналаридан хавотирлар мавжуд. Бу Трампга ҳам тегишли, дея хулоса қилади газета.

Материалда Оқ уйнинг коммуникациялар бўйича директори Стивен Чуннинг баёноти келтирилган. У нашрда баён этилган маълумотга моҳиятан изоҳ бермаган, бироқ шундай деган: 

“Президент яқинда айтганидек, Американи нишонга олган душманлар кўп ва биз бу таҳдидларга қарши туриш учун қўлимиздаги барча воситаларни ишга соламиз”.

Эслатиб ўтамиз, жорий йилнинг 10 июль куни халқаро матбуотда Исроил Вашингтон маъмуриятига Эрон АҚШ Президенти Дональд Трампга суиқасд қилишнинг янги режасини тайёрлаётгани ҳақидаги разведка маълумотларини тақдим этгани ҳақида хабарлар тарқалганди. 

Маълумот учун, 2024 йил 13 июль куни Трамп Пенсильвания штатининг Батлер шаҳридаги сайловолди митингида қуролли ҳужум оқибатида ўнг қулоғидан яраланганди.

2024 йил 15 сентябрь куни Флорида штатининг Уэст-Палм-Бич ҳудудидаги гольф клубида бўлган қуролланган шахснинг пистирмага уриниши Махфий хизмат томонидан сўнгги лаҳзада тўхтатилди.

Жорий йилнинг 25 апрель куни Трамп ва унинг кабинети аъзолари иштирокида Оқ уй мухбирлари уюшмасининг кечки овқатига режалаштирилган қуролли ҳужумга уриниш Махфий хизмат томонидан гумонланувчининг ҳибсга олиниши билан тўхтатилганди.