Трамп Туркиядаги Россия-Украина музокараларида қатнашиши мумкин

Туркия Президенти Ражаб Тойиб Эрдўған ҳақиқатдан ҳам энг юқори даражадаги учрашув ўтказиши мумкин. Бу ҳақда Украина Президенти Владимир Зеленский ижтимоий тармоқ орқали маълум қилди.

Зеленский АҚШ Президенти Дональд Трампнинг Украинадаги можарога барҳам беришга қаратилган Туркиядаги тинчлик музокаралари ҳақидаги баёнотига изоҳ берди.

“Мен ҳозиргина Президент Трампнинг баёнотини эшитдим. Жуда муҳим сўзлар. Мен АҚШ Президенти Дональд Трампнинг тўлиқ ва сўзсиз ўт очишни тўхтатиш ғоясини қўллаб-қувватладим – бу дипломатия учун асос бўлиши учун етарлича вақт. Ва биз буни хоҳлаймиз, биз сукут сақлашга тайёрмиз”, деб ёзган Зеленский.

Украина Президенти Россия етакчиси Владимир Путин билан тўғридан тўғри музокаралар ўтказишга тайёрлигини таъкидлади.

“Мен Президент Трампни Путин билан тўғридан тўғри музокаралар ўтказиш ғояси билан қўллаб-қувватладим. Мен учрашишга тайёр эканимни очиқ айтдим. Мен Туркияда бўламан. Умид қиламанки, руслар учрашувдан қочмайди”, деб ёзди Украина раҳбари.

Зеленский, шунингдек, Оқ уй раҳбарининг Истанбулдаги тинчлик музокараларида иштирок этиши муҳимлигини таъкидлади.

“Ва, албатта, агар Президент Трамп Туркиядаги ушбу учрашувда биз билан бирга бўлса, Украинадаги барчамиз миннатдор бўлардик. Бу тўғри фикр. Биз кўп нарсани ўзгартиришимиз мумкин”, деди у.

Бундан ташқари, Украина Президенти Туркия Президенти Ражаб Тойиб Эрдўғанга учрашувни юқори савияда ўтказишга тайёрлиги учун миннатдорлик билдирди.

“Президент Ражаб Тойиб Эрдўған ҳақиқатан ҳам энг юқори даражада учрашув ўтказиши мумкин. Ёрдам берган барчага раҳмат”, деб ёзган у.

Украина Президентининг баёноти Трамп Украина ва Россия ўртасида Истанбулда бўлиб ўтадиган учрашувда шахсан иштирок этиш имкониятини кўриб чиқаётганини айтганидан кейин янгради. Маълумки, Украина ва Россия ўртасидаги тўғридан тўғри музокаралар 15 май, пайшанба куни Истанбулда ўтказилиши режалаштирилган. Оқ уй раҳбари эҳтимолий оташкесим ҳақида оптимизм билдирди.

“Туркияда 15 май пайшанба куни бўлиб ўтадиган учрашувни эътибордан четда қолдирманг, Президент Эрдўған ажойиб мезбон бўлади. Мен у ерда 30 кунлик сулҳ битимига эришиш мумкинлигини ҳис қиламан. Айни дамда қаерда бўлишимни билмайман, Яқин Шарқнинг бирор жойида бўламан, лекин агар фойдали бўлади деб ўйласам, у ерга учардим”, деди Трамп аввалроқ Оқ уйда журналистлар билан суҳбатда.

Эслатиб ўтамиз, 11 майга ўтар кечаси Россия Президенти Владимир Путин Украинага ҳеч қандай шартларсиз Истанбулда тўғридан тўғри музокара ўтказишни таклиф қилганди.  Украина Президенти Владимир Зеленский эса 15 май куни Истанбулда Россия Президенти Владимир Путин билан тўғридан тўғри музокаралар ўтказишга тайёрлигини маълум қилди.