Трамп Тўқаевни ҳам Тинчлик кенгашига таклиф қилди

АҚШ Президенти Дональд Трамп Қозоғистон етакчиси Қосим-Жомарт Тўқаевни Ғазо бўйича Тинчлик кенгашига таклиф қилди. Бу ҳақда Президент матбуот котиби Руслан Желдибой “Tengrinews”га берган интервьюсида айтиб ўтди. 

“Ҳа, Президент Қосим-Жомарт Тўқаев дунё етакчилари орасида биринчи бўлиб расмий таклиф олди ва Қозоғистон ушбу Тинчлик кенгашининг асосчиларидан бири бўлиш имкониятига эга бўлди. Жавобан, давлат раҳбари АҚШ Президентига миннатдорлик билдирилган хат йўллади ва ушбу янги ташкилотга қўшилиш бўйича розилигини тасдиқлади”, деган Желдибой. 

Унинг сўзларига кўра, Президент Қозоғистон Яқин Шарқда барқарор тинчликни таъминлаш, давлатлараро ишончни мустаҳкамлаш ва глобал барқарорликни оширишга ўз ҳиссасини қўшишга тайёр эканлигини тасдиқлаган. 

Қайд этиш жоиз, Трамп 15 январь куни Ғазо секторини қайта тиклаш ишларини бошқарувчи Тинчлик кенгаши тузилганини маълум қилганди. Ушбу тузилманинг ташкил этилиши Трампнинг Ғазо бўйича тинчлик режасининг муҳим қисми бўлиб, режа халқаро кучларни жойлаштириш масаласини ҳам ўз ичига олади.
Тинчлик кенгаши таркибига Буюк Британия, Германия, Франция, Италия, Саудия Арабистони, Қатар, Миср ва Туркия вакиллари кириши мумкин.

Эслатиб ўтамиз, аввалроқ Дональд Трамп Туркия Президенти Ражаб Тойиб Эрдўғанни Ғазо секторини тиклаш ва унинг хавфсизлигини таъминлаш учун масъул бўладиган Тинчлик кенгашининг таъсисчиларидан бири бўлишга таклиф қилгани ҳақида хабар берилган эди. Қолаверса, Трамп Бразилия етакчиси Луис Инасиу Лула да Сильвани ҳам Ғазо бўйича Тинчлик кенгашига қўшилишга таклиф қилган.