Трамп туфайли евро долларни “тахт”дан ағдариши мумкин

Евро сўнгги 15 йилдаги энг тез ўсишни амалга оширди ва эндиликда бу валюта глобал ноаниқлик ортиб бораётган бир шароитда инвесторлар томонидан АҚШ долларига муносиб муқобил сифатида кўрилмоқда. Бу ҳақда бугун, 14 апрель куни “Bloomberg” хабар берди.

АҚШ Президенти Дональд Трампнинг янги тарифлар сиёсати фонида евро 1,15 долларга яқинлашди. Таҳлилчилар эса келгуси икки чоракда бу кўрсаткич 1,20 долларгача етиши мумкинлигини тахмин қилмоқда. Дональд Трамп маъмурияти томонидан жорий қилинган янги савдо тарифлари сабаб ўтган ҳафтада евро деярли 4 фоизга ўсган ва бу тарихдаги иккинчи энг катта опционлар ҳажми экани айтилмоқда.

Mizuho International plc компаниясининг макро стратегияси раҳбари Жордан Рочестер бозор аллақачон евро қуввати бўйича савдо қилаётгани ва кўплаб инвесторлар аста секин еврони афзал кўраётганини айтган.

“Bloomberg” нашрига кўра, Қўшма Штатларнинг Хитойдан импорт қилинадиган товарларга кенг қамровли тарифларни жорий қилиши долларга нисбатан босим кучайтириб юборган. Натижада, сармоядорлар еврога юзланган ҳолда уни барқарор вариант сифатида кўряпти. Германия молия вазири эса аллақачон ҳукуматларни фурсатдан фойдаланиб, евронинг глобал савдодаги ролини оширишга чақирган.

Шунингдек, АҚШ иқтисодиётининг барқарорлигига нисбатан кўпайган шубҳалар евронинг заҳира валютаси сифатида доллар ўрнини эгаллаши ва ҳозирданоқ унинг баъзи анъанавий функцияларини ўз зиммасига олишни бошлаши тахмин қиляпти. Russell Investments'нинг валюта стратегияси раҳбари Ван Лу дунё яқин келажакда еврога ёрдам берадиган таркибий ўзгаришларнинг гувоҳи бўлишини таъкидлаган.

Маълумот ўрнида шуни таъкидлаб ўтиш жоизки, айни дамда 14 апрель ҳисобига кўра 1 долларнинг ўзбек сўмига нисбати 12 969 сўм бўлса, евроники 14 768 сўни ташкил қилади.

Эслатиб ўтамиз, аввалроқ вазият таранг бўлишига қарамай, Дональд Трамп 13 апрель куни келаси ҳафта яримўтказгичлар импортига ҳам янги божлар жорий этишини эълон қилди.