Трамп Россияга санкция жорий этишдан бош тортди

north_east

Трамп Путин билан 2 соат гаплашди. Натижалар қандай?

north_east

Путин Трамп билан нимага келишганини айтди (видео)

АҚШ Президенти Дональд Трамп 19 май куни россиялик мавқедоши Владимир Путин билан телефон орқали суҳбатдан сўнг Россияга қарши янги санкциялар жорий қилмаслигини маълум қилди. Буни у Украинадаги урушни тугатиш масаласида ҳали олдинга силжиш имконияти мавжудлиги билан изоҳлади.

“Агар сиз буни қилсангиз (Россия Федерациясига қарши санкциялар киритсангиз), бундан ҳам ёмонроқ иш қилишингиз мумкин. Аммо бу содир бўладиган вақт келиши мумкин”, деди Трамп.

Шу билан бирга, АҚШ Президенти Путин билан суҳбатдан кейин сезиларли ўзгаришлар бўлишига ишонч билдирди.

“Бу ерда катта эголар бор, лекин менимча, нимадир содир бўлади”, деди у Оқ уйда журналистлар билан суҳбатда.

Дональд Трамп, агар музокаралар “сезиларли тараққиёт”га эришмаса, Украина атрофидаги можарони ҳал қилишда воситачилик қилишдан бош тортиши мумкинлиги ҳақида огоҳлантирди.

“Мен унга (Путинга) айтдим: биз давом этишимиз керак. Мен айтдим: агар буни қила олмайсиз деб ўйласам, четга чиқаман”, деди Трамп.

Оқ уй раҳбари “қизил чизиқ” борлигини, шундан сўнг у музокараларни рад этишга қарор қилишини таъкидлади, бироқ унинг нималини айтмади. Унга кўра, бу ҳолда Қўшма Штатлар келишувдаги ролини Европага топширади.

Трамп, шунингдек, Украинадаги уруш бошиданоқ Европа муаммоси бўлгани ва Вашингтон аралашмаслиги кераклигини айтди.

Тинчлик музокаралари

Кеча, 19 май куни АҚШ Президенти Путин билан учинчи телефон мулоқотини ўтказди. Учрашувдан сўнг Трамп Россия ва Украина музокараларни “дарҳол” бошлашини айтиб, бунинг шартларини томонларнинг ўзлари келишиб олиши кераклигини, чунки “улар ҳеч ким билмайдиган тафсилотларни билишларини” қўшимча қилди.

Путин, ўз навбатида, Украина билан бўлажак тинчлик шартномаси бўйича меморандум устида ишлашга тайёрлигини маълум қилди, унда келишув тамойиллари, тинчлик битимини тузиш муддатлари ва ўт очишни тўхтатиш шартлари кўрсатилган.

Украина Президенти Владимир Зеленский бундай меморандумни имзолашга рухсат берди. Унинг сўзларига кўра, Киев ҳужжатнинг Россия вариантини Москвадан кутади ва ўз вариантини тайёрлаш ниятида.

Бундан ташқари, Зеленский Киев келишув жараёнининг барча иштирокчиларининг янги учрашувини Туркия, Швейцария ёки Ватиканда ўтказиш имкониятини кўриб чиқаётганини айтди.

Шу билан бирга, Зеленский Украина ўз ҳудудларидан қўшинларини олиб чиқмаслигини яна бир бор тасдиқлади, бу эса Россиядан ўт очишни тўхтатиш шарти сифатида талаб қилмоқда.

“Агар Россия қўшинларимизни еримиздан олиб чиқиб кетиш шартини қўйса, демак, улар уруш тугашини истамайди. Чунки улар Украина буни қилмаслигини аниқ тушунишади”, деди у кеча, 19 май куни кечқурун.

Украина Президентининг фикрича, унинг конституциявий бурчи мамлакат мудофаасини давом эттиришдан иборат.

“Ҳеч қандай ултиматум қўйилмайди, ҳеч ким ўз ерларини, ўз халқини, уйини ташлаб қўймайди”, деб таъкидлади у.