Трамп Россияга қарши “дўзахий” санкциялар жорий қилмоқчи – WSJ

АҚШ Конгресси Вакиллар палатаси Россияга қарши “дўзахий санкциялар” жорий этишни назарда тутувчи қонун лойиҳасини кўпчилик овоз билан маъқуллади. Ҳужжат мамлакат Президенти Дональд Трампга юборилган ва АҚШ Президенти уни имзоламоқчи. Бу ҳақда исми ошкор қилинмаган вакилга таяниб, “The Wall Street Journal” хабар берди.

Аввалроқ, АҚШ Вакиллар палатаси Россияга қарши “дўзахий” санкциялар жорий этишни назарда тутувчи қонун лойиҳасини кўпчилик овоз билан маъқуллаганди. Ҳужжатни 262 нафар конгрессмен қўллаб-қувватлаган, 159 нафари қарши овоз берган, 12 нафари эса овоз беришда қатнашмаган. Август ойи бошида қонун лойиҳаси Сенат томонидан ҳам маъқулланганди.

Гап Американинг “Lindsey O. Graham Sanctioning Russia and Iran Act of 2026” қонун лойиҳаси ҳақида бормоқда. У норасмий равишда “дўзахий” санкциялар деб аталади.

Лойиҳа Россия нефти ва газини сотиб оладиган давлатларга нисбатан иккиламчи савдо чекловларини жорий этишни назарда тутади. Унга кўра, АҚШга олиб кириладиган Россия маҳсулотларига 500 фоизгача, Россия нефти ёки газини харид қиладиган давлатлардан импорт қилинадиган маҳсулотларга эса 100 фоизгача бож жорий этилиши мумкин. Якуний вариантда, хусусан, Россия нефти ва газининг бешта энг йирик импортчиси ҳам тилга олинган.

Москва эса санкцияларни ноқонуний деб ҳисоблайди. Россиянинг АҚШдаги элчихонаси Грэм номи билан аталган қонун лойиҳасини Трамп маъмуриятига “айиқ хизмати” деб атаган. Элчихона чекловлар Вашингтоннинг ўзига ҳам иқтисодий оқибатлар келтириб чиқариши мумкинлигини билдирган. Россия Президенти Владимир Путин аввалроқ “Санкциялар қанча кўп бўлса, уларни жорий қилаётганлар учун шунча ёмон”, деган.

Кремль эса Россияга қарши жорий этилган мисли кўрилмаган миқдордаги санкциялар “ҳеч қандай таъсир кўрсатмаганини” билдирган. Шунингдек, ҳеч қандай чекловлар Москванинг ўз мақсадларини ўзгартиришига мажбур қила олмаслигини маълум қилган.

Бундан ташқари, бугун, 17 сентябрь куни Кремль матбуот котиби Дмитрий Песков янги санкциялар жорий этилиши Украинадаги тинчлик келишувига эришиш йўлларини излашни қийинлаштиришини айтган.

“Биз, албатта, ушбу ҳужжатнинг кўриб чиқилишини кузатяпмиз. Бу дўстона бўлмаган ҳаракатларга тааллуқли ва, албатта, АҚШ томонидан қандайдир қўшимча санкцияларнинг жорий этилиши Украинада тинчлик ўрнатиш йўлларини излаш борасидаги саъй-ҳаракатларни албатта қийинлаштиради”, деган у.