Трамп Путинни ҳам Ғазо Тинчлик кенгашига таклиф қилди

АҚШ Россия Президенти Владимир Путинни Ғазо бўйича Тинчлик кенгаши таркибига киришга таклиф қилди. Бу ҳақда бугун, 19 январь куни Россия Президентининг матбуот котиби Дмитрий Песков журналистларга маълум қилди.

“Ҳа, Президент Путин ҳам дипломатик каналлар орқали ушбу Тинчлик кенгаши таркибига кириш бўйича таклиф олди. Ҳозирда биз бу таклифнинг барча тафсилотларини ўрганмоқдамиз ва ҳамма нозик жиҳатларни аниқлаштириш учун Америка томони билан алоқалар бўлишига умид қиламиз”, дейди Песков.

Эслатиб ўтамиз, АҚШ Президенти Дональд Трамп жорий йил 16 январда Ғазо секторида Тинчлик кенгаши тузилишини эълон қилган эди. Ушбу тузилмани ташкил этиш Трампнинг Ғазо бўйича тинчлик режасининг бир қисми бўлиб, унда халқаро кучларни жойлаштириш ҳам назарда тутилган. Бирлашманинг ижроия қўмитаси таркибига АҚШ Давлат котиби Марко Рубио, Трампнинг махсус вакили Стив Уиткофф, Президентнинг куёви Жаред Кушнер ҳамда Буюк Британиянинг собиқ бош вазири Тони Блэр киради.

Вашингтон Тинчлик кенгашида иштирок этиш учун 50 та давлат раҳбарларига, жумладан, Аргентина, Канада, Франция, Германия, Австралия, Баҳрайн, Миср, Туркия ва Исроил етакчиларига таклиф юборган. Қозоғистон Президенти Қосим-Жомарт Тўқаев ҳам таклиф олган.

“Bloomberg” маълумотларига кўра, АҚШ Ғазо сектори бўйича халқаро Тинчлик кенгашида доимий ўрин олишни истаган давлатлардан камида 1 миллиард доллар бадал киритишни сўрамоқда. Ижроия кенгашининг биринчи раиси Трампнинг ўзи бўлиб, ташкилот аъзолигига кимни қабул қилиш масаласини айнан у ҳал қилади. Тинчлик кенгашига аъзо бўлган ҳар бир давлат уч йилдан ортиқ бўлмаган муддатга тайинланади ва битта овозга эга бўлади. Кенгаш қарорлари кўпчилик овоз билан қабул қилинади, бироқ уларнинг барчаси раис – Трамп томонидан тасдиқланиши шарт.