Трамп Путин ва Зеленскийни учрашишга чақирди

Россия ва Украина Президентлари Владимир Путин ва Владимир Зеленский икки давлат ўртасидаги урушни тугатиш учун учрашиши керак. Бу ҳақда АҚШ Президенти Дональд Трамп кеча, 21 февраль куни Оқ уйда журналистларга маълум қилди.

“Менимча, Президент Путин ва Президент Зеленский учрашиши керак. Биласизми, нима учун? Чунки биз миллионлаб одамларнинг ўлдирилишини тўхтатмоқчимиз”, дейди у.

Қайд этиш жоиз, ўша куни у “Fox News Radio”га Россиянинг Украинага қарши урушини тугатиш бўйича музокараларда Зеленскийнинг иштирок этишига ҳожат йўқлигини айтганди. Шу билан бирга, Америка етакчиси ҳар икки томон билан мулоқотни давом эттиришини таъкидлади.

Бундан ташқари, журналистлар билан ўша учрашувда Трамп 9 май куни Москвага ташриф буюриши ҳақидаги ОАВ хабарларини рад этди. Россияда Иккинчи Жаҳон урушидаги Ғалаба кунини нишонлашда иштирок этишни режалаштиряптими, деган саволга Оқ уй раҳбари “Йўқ, бормайман”, деб жавоб берди.

Франциянинг “Le Point” журнали аввалроқ номи ошкор этилмаган манбаларга таяниб, Трамп Москвадаги парадда иштирок этиши ва у Россия пойтахтида Владимир Путин билан учрашиши ҳақида хабар берган эди.

Россия Президенти матбуот котиби Дмитрий Песков Трампнинг 9 май байрамини нишонлаш учун Москвага ташрифи ҳозирча режалаштирилмаганини айтди. Журналистларнинг томонлар ташриф борасида келишиб олдими, деган саволига Песков салбий жавоб берди.