Трамп Путин билан уруш охирига яқин учрашмоқчи

АҚШ Президенти Дональд Трамп Россия Президенти Владимир Путин билан учрашишни исташини, бироқ бу мулоқот Украинадаги уруш якунига яқинлашган пайтда ўтказилиши кераклигини айтди. Бу ҳақда АҚШ раҳбари Оқ уйда журналистлар саволларига жавоб бераётганида сўз очди.

Трамп Украинадаги уруш умуман бошланмаслиги керак эди, деб ҳисоблашини таъкидлаган. Унинг фикрича, агар 2020 йилги АҚШ президентлик сайловлари сохталаштирилмаганида, Украинада уруш юз бермаган бўлар эди.

“Мен 2016 йилдан 2020 йилгача у ерда бўлдим. Путин билан гаплашардим, аммо бу ҳеч қачон содир бўлмас эди. Бунга ҳеч қандай имконият йўқ эди”, деган Трамп.

АҚШ Президенти урушни “ақлсизлик” деб атаган. Унинг айтишича, ҳар ой ўртача 25 минг нафар ҳарбий ҳалок бўлмоқда.

“Бу бутун бир стадион эканини тасаввур қила оласизми? Ўртача 25 минг киши”, деган у.

Трамп ҳалок бўлаётганлар орасида украиналиклар ҳам кўп эканини таъкидлаган. Шу билан бирга, унинг сўзларига кўра, Россия қўшинлари ҳужум қилаётгани сабабли рус ҳарбийлари орасидаги йўқотишлар ҳам юқори бўлиши мумкин.

“Россияликлар ҳам кўп ҳалок бўлмоқда. Эҳтимол, руслар кўпроқдир, чунки улар олдинга силжимоқда. Улар мудофаа қилмаяпти, ҳужум қилмоқда, ҳужум вақтида эса кўпроқ одам ҳалок бўлади. Аммо украиналик ва россиялик ҳарбийларнинг жуда кўпи ҳалок бўлмоқда. Улар бу аҳмоқона урушни тўхтатиши керак”, деган Трамп.

Трамп, шунингдек, президентлиги даврида “саккизта урушни тўхтатгани” ҳақидаги даъвосини яна бир бор такрорлаган. У айрим можароларни тугатиш Украинадаги урушга қараганда анча мураккаб бўлганини айтган.

АҚШ раҳбари Россия ва Украина президентлари ўртасида “жуда катта адоват” мавжудлигини ҳам таъкидлаган. Бироқ Трамп икки томон ҳам урушни тугатишга яқинлашган, деб ҳисоблашини билдирган.

“Мен иккаласи билан ҳам ишлаяпман ва улар буни тўхтатади, деб ўйлайман”, деган у.

Трамп Россия Президенти билан саммит ўтказишни хоҳлашини, аммо бу учрашув тинчлик келишувини тузиш учун шароит пайдо бўлганидан кейин ўтказилиши кераклигини таъкидлаган.

“Мен Россия, Украина – ҳамма билан яхши муносабатларга эга бўлишимизни хоҳлайман. Бу бизнес учун ҳам жуда яхши бўлар эди. Россиянинг улкан ҳудудлари ва жуда қимматли ерлари бор, у ерда кўп яхши ишлар амалга оширилмоқда”, деган АҚШ Президенти.

Трамп, шунингдек, Путин билан учрашувни исталган пайтда ташкил қилиш мумкинлигини айтган. Бироқ у саммитни “уруш тугай бошлаганида” ўтказишни хоҳлашини ва бу вақт келишига ишонишини билдирган.

“Биз учрашув ўтказишимиз мумкин. Ишонинг, мен буни дарҳол ташкил қила оламан. Аммо мен бу учрашувни уруш тугай бошлаганида ўтказишни хоҳлайман. Менимча, шундай бўлади”, дея хулоса қилган Трамп.

Эслатиб ўтамиз, аввалроқ Россия Президенти Владимир Путин Украинадаги урушни Донбассни тўлиқ эгаллаш каби минимал мақсадга эришмасдан якунлаш ўз ҳаёти учун хавф туғдиришидан хавотирда экани ҳақида хабар қилинганди.