“Мени осиб қўйишади”: Путин урушни тугатишдан қўрқмоқда

Россия Президенти Владимир Путин Украинадаги урушни Донбассни тўлиқ эгаллаш каби минимал мақсадга эришмасдан якунлаш ўз ҳаёти учун хавф туғдиришидан хавотирда. Бу ҳақда Кремлга яқин манбаларга таяниб, “The Economist” хабар берди.

Нашр манбаларидан бирининг айтишича, Путин урушни ҳеч бўлмаганда Донбасснинг тўлиқ эгалланишига эришмасдан якунлаш унинг ҳаётига хавф туғдириши мумкин, деб ҳисоблайди.

“Улар мени осиб қўйишади”, деган Путин ўзига яқин кишиларга.

Бироқ Россия раҳбари учун урушни ҳозирги суръатда давом эттириш ҳам муаммоли бўлиб қолмоқда. Нашрга кўра, Россия армияси бир неча йилдан бери фронтда ҳал қилувчи бурилиш ясай олмаяпти. Шу сабабли Кремл урушни шу ҳолатда давом эттиришдан кўра, ҳарбий ҳаракатларни кучайтиришни маъқул кўрмоқда.

“The Economist” манбаларига кўра, Путин фронтга яна 300-400 минг россияликни юборишни режалаштирмоқда. Бунинг учун янги сафарбарлик эълон қилиниши шарт эмас. Чунки 2022 йил сентябрь ойида эълон қилинган сафарбарлик тўғрисидаги фармон ҳануз кучда.

Янги аскарларни жалб қилиш вазифаси эса ҳудудий ҳокимиятларга юкланиши мумкин. Улар маҳаллий аҳоли орасида босим ўтказиш орқали керакли миқдордаги эркакларни урушга жалб қилишга уринади. Манбалар янги тизим аллақачон Россиянинг Пенза вилоятида синовдан ўтказилаётганини билдирган. У ерда эркаклар кўчаларда ушланиб, мажбуран урушга юборилаётгани айтилмоқда.

Шунингдек, нашр Россия томонидан эскалациянинг бошқа йўналишлари ҳам бўлиши мумкинлигини ёзган. Хусусан, Украина иттифоқчиларига қарши гибрид операциялар ва диверсияларни кучайтириш эҳтимоли бор.

Ғарб махсус хизматлари Россия Украинага қурол-яроғ ва ҳарбий техника етказиб берувчи Европадаги заводларга ҳужум қилиши мумкинлигидан хавотирда. Бироқ улар Путин НАТО билан тўғридан-тўғри ҳарбий тўқнашувга боришни истамайди, деб ҳам ҳисобламоқда.

Шунингдек, Путин Россия ичида ўз сиёсатига қарши бўлганларга нисбатан репрессияларни кучайтириши мумкин. “The Economist” манбаларидан бирининг айтишича, бундай чоралар мухолифлар Путиннинг ҳокимиятига жиддий хавф туғдиргани учун эмас, балки Россия раҳбари ўз кучини намойиш этиши кераклиги сабабли қўлланиши мумкин.

Манбага кўра, Путин АҚШ Марказий разведка бошқармаси директорининг Москвага ташрифини ҳам заифлик белгиси сифатида қабул қилган.

Шу билан бирга, Россия элитаси орасида урушга нисбатан кайфият тобора тушкунлашмоқда. Нашр суҳбатдошларидан бирининг айтишича, асосий муаммо иқтисодиётнинг ҳолати ёки фронтдаги муваффақиятларнинг йўқлигида эмас, балки уруш сабаб мамлакат қарийб беш йил вақтини йўқотганида. Унинг таъкидлашича, уруш қандай натижа билан якунланишидан қатъий назар, қарийб беш йил давом этган жанговар ҳаракатларнинг ўзи Россия учун муваффақиятсизлик сифатида баҳоланмоқда.

Бироқ “The Economist”га кўра, Россиядаги иқтисодий ва сиёсий муаммоларнинг ўзи ҳозирча Путиннинг ҳокимиятини хавф остига қўймаяпти. Россия раҳбарида урушни давом эттириш учун етарли иқтисодий ресурслар, босим ва таъқиб воситалари мавжуд.

Нашр таҳлилига кўра, айнан шу имкониятлар Путинга урушни тўхтатиш ўрнига уни янада кучайтириш йўлидан бориш имконини бермоқда.

Эслатиб ўтамиз, аввалроқ хакерлар Россиянинг “Сбербанк” банкига тегишли экани айтилган, Россия ва Украина уруши якунланишининг эҳтимолий сценарийлари келтирилган ҳужжатни эълон қилган эди. Унда уруш қандай якунланиши мумкинлиги бўйича 8 та сценарий келтирилган.