Трамп пойтахтга ўлим жазосини қайтарди

АҚШ Президенти Дональд Трамп Вашингтон (Колумбия округи) ҳудудида ўлим жазоси жорий этилиши ҳақида фармон имзолади. Ҳужжат матни Оқ уй расмий сайтида эълон қилинди.

Америка раҳбарининг сўзларига кўра, қарор пойтахтнинг махсус мақоми билан боғлиқ. Оқ уйнинг таъкидлашича, Колумбия округида сўнгги йилларда олиб борилган “юмшоқ сиёсат” жиноятчиликнинг кескин ўсишига олиб келиб, пойтахт аҳолиси, меҳмонлари ҳамда федерал идоралар фаолиятини хавф остига қўйган.

Хабарга кўра, Вашингтон мамлакатдаги энг хавфли шаҳарлар қаторига кирган ва 2024 йилда бу ерда қотиллик даражаси ҳар 100 минг аҳолига 27,3 тани ташкил қилган. Бу кўрсаткич АҚШ бўйича тўртинчи энг юқори натижа бўлиб, Нью-Йоркдагидан қарийб олти баробар кўп.

“The Guardian” нашрининг ёзишича, Трамп ўлим жазоси қайтарилишини эълон қилар экан, қотиллик содир этган ҳар бир киши бу жазога дуч келишини айтиб, уни жиноятни олдини олишда самарали чора сифатида баҳолаган.

АҚШ пойтахтида сўнгги қатл 1957 йилда амалга оширилган эди. 1981 йилда Вашингтон шаҳар кенгаши ўлим жазосини бутунлай бекор қилган. Аммо Колумбия округининг махсус мақоми ва федерал ҳукумат назорати сабабли Трамп бу қарорни бекор қилиш ҳуқуқига эга бўлди. Президент фармонининг ижросини АҚШ прокуратураси ва Адлия вазирлиги назорат қилади.

Трамп қарорини танқид қилганлар суд жараёнларида ҳакамлар ҳайъати қора танли айбланувчиларга нисбатан адолатсиз муносабатда бўлишини таъкидлади. Маълумотларга кўра, АҚШда сўнгги 50 йил ичида қатл этилгач, кейинчалик 200 киши оқланган. Улардан 108 нафари қора танлилар бўлган.

Бугунги кунда АҚШнинг 50 штатидан 27 тасида ўлим жазоси амал қилади. Бундай жазо тури энг кўп қўлланадиган ҳудудлар мамлакат жанубидаги штатлар – Юта, Аризона, Флорида ва яна 13 та штатдир. Олти штатда ўлим жазоси қонуний рухсат этилган бўлса-да, у ерда мораторий амал қилмоқда. 2021 йилда собиқ президент Жо Байден федерал даражадаги суд ишларида ўлим жазосига мораторий жорий қилган эди. Трамп эса Оқ уйга қайтган куни бу мораторийни бекор қилди.

Эслатиб ўтамиз, аввалроқ Вашингтондаги Исроил элчихонасининг икки ходимини отиб ўлдирган шахсга ўлим жазоси тайинланиши мумкинлиги ҳақида хабар берилган эди.