Трамп олдида икки йўл бор – Эрон Президенти

АҚШ Президенти Дональд Трамп танлаши керак: Яқин Шарқда тинчликни қўллаб-қувватлаш ёки Исроилга Қўшма Штатларни Эрон билан урушга тортишига имкон бериш. Бу ҳақда Эрон Ислом Республикаси Президенти Масъуд Пезешкиён америкалик журналист Такер Карлсонга берган интервьюсида маълум қилди.

“Трамп минтақамизни тинчлик ва ёруғ келажак сари етаклаб, Исроилни ўз ўрнига қўйиши ёки чуқурга, тубсиз чуқурга, ботқоққа тушиб, Исроил Бош вазири Биньямин Нетаньяху Қўшма Штатларни ёки АҚШ Президентини тортмоқчи бўлган урушга кириши мумкин. Танлов Америка Президентида”, деди Пезешкиён.

Шунингдек, у Яқин Шарқдаги янги қуролли можаро минтақанинг янада беқарорлашишига олиб келиши ва бу Америка манфаатларига зарар келтиришини билдирди. 

Пезешкиён Эрон АҚШ билан музокараларни қайта бошлашга тайёр эканини, аммо ишонч масаласи борлигини таъкидлади.

“Биз музокараларни қайта бошлашда муаммо кўрмаяпмиз. Аммо музокараларни қайта бошлаш ҳақида бир жиҳат бор – Қандай қилиб биз АҚШга яна ишонамиз? Музокаралар давомида Исроил режимига яна бизга ҳужум қилиш учун рухсат берилмаслигини қандай аниқ биламиз?” деди Президент.

У, шунингдек, Исроилнинг ҳаракатлари оқибатида “енгиб ўтиш керак бўлган инқироз” юзага келганини таъкидлади.

“Айтганимдек, биз енгишимиз керак бўлган инқироз бор”, дея қўшимча қилди Пезешкиён.