Tramp oldida ikki yo‘l bor – Eron Prezidenti

AQSH Prezidenti Donald Tramp tanlashi kerak: Yaqin Sharqda tinchlikni qo‘llab-quvvatlash yoki Isroilga Qo‘shma Shtatlarni Eron bilan urushga tortishiga imkon berish. Bu haqda Eron Islom Respublikasi Prezidenti Mas’ud Pezeshkiyon amerikalik jurnalist Taker Karlsonga bergan intervyusida ma’lum qildi.

“Tramp mintaqamizni tinchlik va yorug‘ kelajak sari yetaklab, Isroilni o‘z o‘rniga qo‘yishi yoki chuqurga, tubsiz chuqurga, botqoqqa tushib, Isroil Bosh vaziri Binyamin Netanyaxu Qo‘shma Shtatlarni yoki AQSH Prezidentini tortmoqchi bo‘lgan urushga kirishi mumkin. Tanlov Amerika Prezidentida”, dedi Pezeshkiyon.

Shuningdek, u Yaqin Sharqdagi yangi qurolli mojaro mintaqaning yanada beqarorlashishiga olib kelishi va bu Amerika manfaatlariga zarar keltirishini bildirdi. 

Pezeshkiyon Eron AQSH bilan muzokaralarni qayta boshlashga tayyor ekanini, ammo ishonch masalasi borligini ta’kidladi.

“Biz muzokaralarni qayta boshlashda muammo ko‘rmayapmiz. Ammo muzokaralarni qayta boshlash haqida bir jihat bor – Qanday qilib biz AQSHga yana ishonamiz? Muzokaralar davomida Isroil rejimiga yana bizga hujum qilish uchun ruxsat berilmasligini qanday aniq bilamiz?” dedi Prezident.

U, shuningdek, Isroilning harakatlari oqibatida “yengib o‘tish kerak bo‘lgan inqiroz” yuzaga kelganini ta’kidladi.

“Aytganimdek, biz yengishimiz kerak bo‘lgan inqiroz bor”, deya qo‘shimcha qildi Pezeshkiyon.