Трамп Обама, Байден ва Буш билан Оқ уйда футбол томоша қилмоқчи

АҚШ Президенти Дональд Трамп мамлакатнинг собиқ президентлари Барак Обама, Жо Байден ва Жорж Бушни Оқ уйга таклиф қилмоқчи эканини айтди. Бу ҳақда у АҚШ вице-президенти Жей Ди Вэнснинг рафиқаси Уша Вэнс олиб борадиган “Storytime with the Second Lady” подкастида гапирди.

Подкаст давомида Трамп Оқ уй тарихий ассоциацияси томонидан нашр этилган “Президентлар ўйнайди” (“Presidents Play”) номли болалар китобини овоз чиқариб ўқиб берган. Ушбу китобда Президентларнинг спорт билан шуғулланаётгани ҳамда дам олиш учун Оқ уй ва унинг ҳудудидан фойдаланаётгани акс этган суратлар жамланган.

Оқ уй раҳбари варақни ўгирганда, у ерда Оқ уйдан туриб Суперкубок (Super Bowl) ўйинининг жонли эфирини кузатаётган президент тасвирланган. Бу сурат унга янги бир ғоя берганини иккинчи хоним Уша Вэнсга айтиб ўтган.

“Балки мен Барак Ҳусейн Обама, Жо Байден ва Бушларни ёки Бушни таклиф қилишим керакдир? Балки улардан биронтасини биргаликда футбол учрашувини томоша қилишга чақирарман? Бу ажойиб воқеа бўлмасмиди? Матбуот бундан телбаларча ҳайратга тушган бўларди”, дейди у.

Эслатиб ўтамиз, аввалроқ Дональд Трамп мамлакат мустақиллигининг 250 йиллигига бағишланган байрам тадбирларини Жанубий Дакота штатидаги Маунт-Рашмор ёдгорлигида нутқ сўзлаш билан бошлагани ҳақида хабар берилган эди.