“Коммунизм – мустақиллик душмани”. Трамп АҚШ мустақиллигининг 250 йиллиги тадбирида нималар деди?

АҚШ Президенти Дональд Трамп мамлакат мустақиллигининг 250 йиллигига бағишланган байрам тадбирларини Жанубий Дакота штатидаги Маунт-Рашмор ёдгорлигида нутқ сўзлаш билан бошлади. У ўз чиқишида мамлакатдаги “коммунистик таҳдид” ҳақида гапириб, уни қўллаб-қувватловчиларни “1776 йил 4 июль душманлари” деб атади. Бу ҳақда “The Guardian” нашри хабар берди.

Қайд этилишича, Трампнинг чиқиши қарийб ярим соат давом этган. Уни йиғилганлар “USA! USA!” деган ҳайқириқлар билан кутиб олган. Нутқ вақтида одамлар тепасидан F-16 қирувчи самолётлари учиб ўтган.

Президент Маунт-Рашморга тасвири ўйиб ишланган тўрт президент – Жорж Вашингтон, Томас Жефферсон, Теодор Рузвельт ва Авраам Линкольнни мақтаган.

“Улар амал одамлари, улкан мақсадлар соҳиблари, жасоратли, тақдир белгилаган ва ниҳоятда ақлли инсонлар эди. Энг муҳими, улар тарихдаги буюк шахслар эди”, деган Трамп.

У Американинг ўзига хослиги нафақат Конституцияси, балки миллий маданияти ва ўзига хос миллий ўзлигига ҳам таянишини таъкидлаган.

“Биз мамлакатимизга унинг миллий ўзлигини қайтариб берамиз”, у.

Шундан сўнг Трамп анъанавий давлат раҳбарлари каби барча фуқароларни бирлаштиришга қаратилган нутқдан чекиниб, ноябрь ойида бўлиб ўтадиган Конгресс оралиқ сайловлари олдидан демократларни кескин танқид қилган. У сўнгги пайтларда бир неча бор такрорлаётган даъвосини яна илгари суриб, илғор қарашдаги демократларни “коммунистлар” деб атаган ҳамда уларни Америка учун экзистенциал таҳдид сифатида тасвирлаган.

Маълум қилинишича, бу нутқ Нью-Йорк мэри, демократик социалист Зоҳран Мамданининг муҳожирларни қўллаб-қувватловчи ва Трамп ҳамда унинг “Make America Great Again” ҳаракатини танқид қилган чиқишидан бир неча соат ўтиб янграган.

Трамп, шунингдек, коммунизм ҳақидаги риторикасини муҳожирларга қарши сиёсати билан боғлаган.

“Совуқ урушда коммунизм таҳдиди устидан ғалаба қозонганимиздан бир авлод ўтиб, бугун мамлакатимизда коммунистик таҳдид яна бош кўтармоқда. Бунинг ичида ҳаёт тарзимизга мутлақо зид ғояларни қўллаб-қувватлайдиган янги келганлар ҳам бор”, деган у.

Президент коммунизмни Америка эркинлиги учун икки жаҳон уруши ва 2001 йил 11 сентябрь террорчилик ҳужумларидан ҳам каттароқ таҳдид деб атаган.

“Бу Конституциянинг душмани. Энг аввало, у 1776 йил 4 июльнинг душмани. Коммунизм ҳаёт, эркинлик ва бахтга интилишнинг мутлақо аксидир. У – ўлим, зулм ва ёвузликка интилишдир”, деб айтган Трамп.

Унинг таъкидлашича, коммунистлар Худо, дин, қонун, адолат, анъаналар ва инсонга берилган табиий ҳуқуқларни ҳурмат қилмайди.

“Сиз ё Карл Марксга содиқ бўласиз, ё Америкага. Ё коммунист бўласиз, ё ватанпарвар. Иккаласи бир вақтнинг ўзида бўлиши мумкин эмас”, деган Президент.

Нашрга кўра, Трамп сўнгги вақтларда АҚШ тарихини қайта талқин қилишга уринаётгани учун танқид қилиб келинмоқда. Унинг танқидчиларига кўра, президент мамлакат тарихини асосан оқ танли насроний эркаклар нуқтаи назаридан талқин қилиб, Жорж Вашингтон ва Томас Жефферсон қулдор бўлганини эътибордан четда қолдирмоқда.

Трамп нутқида бу борада ҳам ўз танқидчиларини нишонга олган.

“Меросимиз ҳақида марксистик ёлғонларни тарқатаётган, фарзандларимизга бу ер босиб олинган ер экани ёки қаҳрамонларимиз золим бўлганини айтаётганлар нафақат ўтмишимизни ҳақорат қилмоқда. Улар келажагимизга ҳам ҳужум қилмоқда. Бунга йўл қўймаймиз”, деган у.

Билдирилишича, айни пайтда Трамп нутқ сўзлаган Блэк-Хиллс ҳудуди 1877 йилда АҚШ ҳукумати томонидан Сиу қабиласидан шартнома шартларига зид равишда тортиб олинган ҳудуд ҳисобланади.

Президент коммунизм ҳақидаги баёнотларини муҳожирлар мавзуси билан ҳам боғлаб, уларни мамлакатдан чиқариб юбориш ҳақида гапирган.

“Биз коммунизмни тезда енгамиз ва уларни сургун қиламиз. Биз уларни тезда юборамиз ва мамлакатимизни янада каттароқ, кучлироқ ва яхшироқ қиламиз. Америка ҳеч қачон коммунистик мамлакат бўлмайди”, деб таъкидлаган АҚШ раҳбари.

У, шунингдек, Конгрессни филибастер қоидасини бекор қилиш ва Save America Act қонунини қабул қилишга чақирган. Танқидчилар ушбу қонунни сайловчиларнинг овоз бериш ҳуқуқини чеклашга қаратилган ҳужжат деб баҳолаб келмоқда.

“Шуни қилсак, юз йил давомида сайловда ютқазмаймиз. Коммунистик партия ноқонуний муҳожирлар, жиноятчилар ва ишлашни истамайдиганлардан иборат”, деган у.

Маълумот учун, бугун, 4 июль куни АҚШда мустақилликнинг 250 йиллик юбилей куни нишонланмоқда. Трамп Вашингтондаги Миллий аллеяда байрам нутқи учун яна бир марта чиқиш қилиши режалаштирилган. У ерда мустақиллик куни муносабати билан йирик мушакбозлик намойиши ўтказилиши режалаштирилган.

Эслатиб ўтамиз, аввалроқ Антверпен бутунжаҳон олмос маркази (AWDC) АҚШ Президенти Дональд Трампга мамлакат мустақиллигининг 250 йиллиги муносабати билан 321 та табиий бриллиант қўйилган олтин узук совға қилган эди.