Трамп Хитой, Россия ва КХДРнинг АҚШга душман бўлмаслиги шартини айтди

АҚШ собиқ президенти Дональд Трамп Россия Федерацияси, Хитой ҳамда Шимолий Кореянинг Қўшма Штатларга душман бўлмаслик шартини эълон қилди. Бу ҳақда у Виржиния штатидаги тарафдорлари билан учрашувида сўз очди.

Трампга кўра, ушбу мамлакатлар билан дўстона муносабат ўрнатилиши ҳамда душманлик кайфиятидан воз кечилиши учун Оқ уйнинг бошида “ақлли президент” туриши керак. Бу гаплари орқали республикачи ўзининг номзодига шама қилган.

“Бизнинг ташқи душманларимиз бор. Булар Хитой, Россия, Шимолий Корея давлатлари. Аммо, аслида, агар сизда ақлли президент бўлса, улар сизга душман бўлмайди. Сиз шунчаки улар билан тил топишиб кетасиз”, деган Трамп.

Трампнинг таъкидлашича, Қўшма Штатларнинг энг ашаддий душманлари мамлакат ташқарисида эмас, балки мамлакат ичидадир. У ўзининг сиёсий бошқаруви пайтида АҚШ бошқа мамлакатлар ҳурматига сазовор бўлганига ва ҳеч қандай муаммога дуч келмаганини билдирган.

Маълумот учун, жорий йилнинг 27 июнь куни Жоржия штатининг Атланта шаҳридаги СNN телеканалида АҚШда президентлик сайловлари олдидан илк теледебат бўлиб ўтганди. СNN таҳлилига кўра, Трамп бу теледебатда 30 дан ортиқ ёлғон даъволар билан чиққан. Унинг кўплаб сўзлари жорий президентлик кампанияси пайтида ёки ундан олдин аллақачон рад этилган даъволарни ўз ичига олган. Ўз ўрнида, Байден ҳам баҳс давомида 9 та ёлғон маълумотларни тақдим қилган. Лекин бу Трамп билан солиштирганда анча кам.

Эслатиб ўтамиз, аввалроқ Байден ёш бўлмаса ҳам президентлик вазифасини бажара олишини билдирди. Шунингдек, АҚШ вице-президенти Камола Ҳаррис демократларнинг сайловолди биринчи баҳсидан кейин Оқ уй раҳбари Жо Байденнинг ёмон ишлаши ҳақидаги хавотирларини йўқ қилишга урингани ҳақида хабар берилганди.