Трамп Хитой маҳсулотларига янги божлар жорий қилди

АҚШ Президенти Дональд Трамп Хитойдан келтирилаётган айрим маҳсулотлар учун божлар жорий этиш тўғрисидаги фармонни имзолади. Бу ҳақда Оқ уй матбуот хизмати хабар берди.

Фармонда айтилишича, бож ундирилмайдиган Хитой товарларидан энди бундай мақом олиб ташланади, эндиликда уларга ҳам 10 фоизлик божлар жорий этилади.

“Хитойдан олиб келинаётган айрим товарлар учун божсиз режим Президент томонидан тизимлар божларни тўлиқ ва самарали ундиришга тайёрлиги тўғрисида хабар берилгандан сўнг бекор қилинади”, дейилади фармонда.

Оқ уй сайтида эълон қилинган ҳужжат матнига кўра, бу Хитойдан Америкага кириб келаётган гиёҳванд моддаларга қарши курашиш учун зарур.

ОАВнинг хабар беришича, олдинроқ Трамп Хитойни АҚШга гиёҳванд моддалар етказиб беришни осонлаштирганликда айблаган. Пекин эса Вашингтоннинг барча айбловларини рад этган.

Эслатиб ўтамиз, жорий йилнинг 4 февраль куни Хитой ҳукумати бир қатор Америка товарларига бож жорий этилишини эълон қилганди. Пекиннинг ушбу қарори АҚШнинг янги маъмуриятининг Хитойдан келадиган товарларга божларни ошириш режаларига жавоб бўлган. Хитой Савдо вазирлиги кўмир ва суюлтирилган газга 15 фоизлик, шунингдек, нефть хомашёси, қишлоқ хўжалиги техникаси ва бир қатор транспорт воситаларига 10 фоизлик бож тўлови жорий этилишини эълон қилганди. Вазирлик ўз қарорини изоҳлар экан, АҚШнинг “бир томонлама тарифларни ошириши Жаҳон савдо ташкилоти қоидаларини жиддий бузаётганини” таъкидлаб, “Хитой ва АҚШ ўртасидаги нормал иқтисодий ва савдо ҳамкорлигига зарар етказаётганини” таъкидлаганди.