Трамп канадаликларга мурожаат йўллади

АҚШ Президенти Дональд Трамп бугун, 28 апрель куни Канадада муддатидан аввалги парламент сайловлари ўтаётган кунда яна бир бор Канаданинг АҚШнинг 51-штатига айланиши кераклигини таъкидлади. Бу ҳақда у ўзининг Truth Social платформасида пост қолдирди.

“Солиқларингизни икки баравар камайтирадиган, ҳарбий қудратингизни дунёдаги энг юқори даражага бепул кўтармоқчи бўлган, автомобилсозлик, пўлат, алюминий, ёғоч, энергетика ва бошқа соҳаларда фаолият юритувчи корхоналарни тўрт баравар ўстириш имконини яратадиган одамни танланг. Буларнинг барчаси божхона ва солиқларсиз амалга ошади, агар Канада АҚШнинг қимматбаҳо 51-штатига айланса. Энди бундан буён узоқ йиллар олдин сунъий равишда ўрнатилган чегараларга ҳожат қолмайди”, деб ёзди Трамп.

Трампнинг таъкидлашича, Канаданинг АҚШга қўшилишида “ҳеч қандай камчилик бўлмайди”.

“Америка энди аввалгидек Канадага ҳар йили юзлаб миллиард долларларни бериб туролмайди. Бунинг мантиқий сабаби йўқ, агар Канада штатга айланмаса”, дея урғулади Дональд Трамп.

Эслатиб ўтамиз, бунгача ҳам Трамп бир неча бор Канада АҚШнинг 51-штатига айланиши кераклигини айтганди. Канада эса буни қатъий рад этиб келади. Бундан ташқари, АҚШ томонидан қўшни мамлакат товарларига жорий етилган божлар ортидан Канаданинг янги Бош вазири АҚШ билан “олдинги” муносабатлар тугаганини айтди.