Трамп Ғазода 5000 ҳарбийга мўлжалланган база қурмоқчи

АҚШ Президенти Дональд Трамп маъмурияти Ғазо секторида 5 минг нафар ҳарбийни жойлаштириш учун Ҳалқаро барқарорлаштириш кучлари (ҲБК) базасини қуришни режалаштирмоқда. Бу ҳақда давлат харидлари ҳужжатларига таяниб, “The Guardian” хабар берди.

Режага кўра, база Ғазонинг жанубида 350 акрдан ортиқ (1,4 квадрат километрдан зиёд) ҳудудни эгаллайди. Объект 26 та зирҳли кузатув минораси ва тиканли сим билан ўралади. Ҳудудда отиш майдони, бункерлар ва ҳарбий техника омборлари жойлаштирилади. ҲБК яқинда ташкил этилган “Тинчлик кенгаши” таркибига киради. Унга Дональд Трамп раҳбарлик қилади, унинг куёви Жаред Кушнер эса ҳамраҳбар вазифасини бажаради. Хабар қилинишича, кенгашга БМТ Хавфсизлик кенгаши томонидан секторни вақтинча бошқариш ва тартибни сақлаш учун ваколат берилган.

Нашрнинг ёзишича, жанг ҳудудларида ишлашга ихтисослашган халқаро қурилиш компанияларининг кичик гуруҳи қурилиш жойига танишув ташрифини амалга оширган. Трамп маъмурияти вакили шартнома бўйича изоҳ беришдан бош тортиб, махфийлик сиёсатига ишора қилган ҳамда “база ҳудудида америкалик ҳарбийлар бўлмайди”, деган.

АҚШ режаси 2025 йил октябрда урушнинг фаол босқичи якунланганидан кейинги мураккаб вазият фонида илгари сурилмоқда. BBC маълумотига кўра, сулҳ бошланганидан тўрт ой ўтиб ҲАМАС анклав устидан назоратни қайта тиклашга киришган – солиқ йиғмоқда, кўчаларни патрул қилмоқда ва суд тизимини бошқармоқда.

Трампнинг тинчлик режасининг кейинги босқичи, жумладан, секторни тиклаш, бевосита ҲАМАСни қуролсизлантиришга боғлиқ. Музокарачилар қурол топшириш тафсилотларини муҳокама қилмоқда. Ҳаракат вакили Ҳозем Қосим BBC’га берган баёнотида бу масалани “босқинчиларнинг урушни қайта бошлашига баҳона қолдирмайдиган” ва шу билан бирга Америка Президенти режасига мос келадиган тарзда ҳал қилиш мумкинлигини айтган.