Трамп Эронни бомбардимон қилиш билан таҳдид қилди

АҚШ Президенти Дональд Трамп Эрон ядро қуроли бўйича келишувга эришмаса, мисли кўрилмаган бомбардимонларга дуч келиши муқаррарлигини айтди. Бу ҳақда у кеча, 30 март куни “NBC News”га телефон орқали берган интервьюсида маълум қилди.

Нашрнинг ёзишича, Эрон Қўшма Штатлар билан ядровий қурол ишлаб чиқиш бўйича келишувга эришмаса, мисли кўрилмаган бомбардимонларга дуч келади. Оқ уй раҳбари Теҳронга ҳарбий ҳаракатлар билан таҳдид қилган.

“Агар улар битим тузишмаса, бомбардимон бўлади. Бу улар ҳеч қачон кўрмаган бомбардимонлар бўлади”, дея огоҳлантирган Оқ уй раҳбари.

Ўз навбатида, Эроннинг IRNA давлат агентлиги Эрон Президенти Масъуд Пезешкиённинг Трампнинг яқинда йўллаган мактубига жавоби ҳақида хабар берган. Унинг таъкидлашича, Теҳрон Вашингтон билан мулоқотга очиқ, бироқ воситачилар орқали.

north_east

Эрон АҚШ билан музокара ўтказмайди – Хоманаий

“Гарчи жавобда икки томон ўртасида тўғридан-тўғри музокаралар ўтказиш имконияти истисно этилса-да, унда билвосита музокаралар учун йўл очиқлиги айтилган”, дейилади хабарда.

Қўшимча қилинишича, музокаралар жараёнининг давом этиши Америка томонининг хатти-ҳаракатларига боғлиқ.

Эслатиб ўтамиз, аввалроқ Эрон Президенти Масъуд Пезешкиён АҚШ кучли босим қилаётган пайтда ядровий келишув бўйича музокаралар ўтказишдан бош тортганди. Унинг айтишича, АҚШ музокараларни баҳона қилиб, Эроннинг ядро дастуридан ташқари ҳарбий салоҳияти ва минтақадаги таъсирини ҳам чеклашга ҳаракат қилмоқда. Теҳрон эса “максимал босим” остида ҳеч қандай мулоқот бўлмаслигини таъкидлаган.