Трамп дунёни 3-Жаҳон урушидан қутқарди – Путиннинг одами

АҚШ Президенти Дональд Трамп маъмурияти Учинчи жаҳон уруши бошланишининг олдини олишга муваффақ бўлди ва Украинадаги можарони ҳал қилиш жараёнида муваффақиятларга эришмоқда. Бу ҳақда Россия тўғридан тўғри инвестициялар жамғармаси раҳбари, Россия Президентининг хорижий сармоялар ва иқтисодий ҳамкорлик бўйича махсус вакили Кирилл Дмитриев “Fox News” телеканалига берган интервьюсида айтиб ўтди.

Маълум қилинишича, Дмитриев АҚШ Президенти Дональд Трамп маъмуриятининг асосий аъзолари билан учрашувлар ўтказган. Нашрнинг ёзишича, Россия вакили Москванинг тинчлик ва йирик молиявий битимлар тузишга тайёрлигини намойиш этиш учун АҚШга келган.

"Ҳеч қандай шубҳа йўқки, Президент Трамп жамоаси нафақат Учинчи жаҳон урушининг олдини олди, балки аллақачон Украина масаласини ҳал қилишда сезиларли ютуқларга эришди”, деган Россия вакили.

Шунингдек, Дмитриев Россия етакчиси Владимир Путинга Вашингтонга сафари натижалари ҳақида ҳисобот беришини ҳам айтиб ўтган. “Reuters” агентлигининг ёзишича, Дмитриев Дональд Трампнинг Яқин Шарқ бўйича махсус вакили Стив Уиткофф билан учрашган. 

Эслатиб ўтамиз, аввалроқ АҚШ Президенти Дональд Трамп Россия Президенти Владимир Путин Украинада ўт очишни тўхтатиш бўйича “келишувнинг ўзига тегишли қисмини” бажаришига ишонишини айтганди.