Трамп 5 млн долларлик “олтин карта”си билан мақтанди (видео)

АҚШ Президенти Дональд Трамп АҚШ фуқаролигини олиш имконини берувчи “олтин карта”ни тақдим этди. Бу ҳақда “New York Post” нашри хабар берди.

Нашрнинг ёзишича, Трамп Air Force One самолёти бортида журналистларга 5 миллион доллар турадиган янги “олтин карта”нинг дизайнини фахр билан кўрсатган.

“5 миллион доллар эвазига бу сизники бўлиши мумкин. Бу карталарнинг биринчиси эди. Биласизми, бу қандай карта? Бу олтин карта – Трамп картаси”, деган у журналистларга.

Трампнинг айтишича, у картанинг биринчи харидори бўлган, аммо иккинчи харидор ким бўлганини билмайди. У картанинг эҳтимол икки ҳафтадан камроқ вақт ичида чиқарилишини қўшимча қилган.

Билдирилишича, “олтин карта”лар тизими EB-5 визаси дастурининг қайта ишлаб чиқилган кўринишига асосланган. Ушбу дастур хорижий фуқароларга АҚШга тахминан 1 миллион доллар сармоя киритиш эвазига грин-карта олиш имконини беради. Грин-карта эса визадан фарқли ўлароқ, фуқаролиги бўлмаганларга АҚШда доимий яшаш ҳуқуқини беради ва фуқароликка йўл очади.

Баъзи визалардан фарқли равишда, хорижий фуқароларни муайян иш жойларига боғлаб қўядиган ҳолатлар бўлмайди, грин-карталар эса муҳожирларга иш жойини эркин танлаш имконини беради.

Эслатиб ўтамиз, шу йил февраль ойида Трамп АҚШда бой хорижликларга мамлакатда яшаш ва ишлаш ҳуқуқини берувчи “олтин карталар” сотилиши ҳақида эълон қилган эди. Кейинроқ эса АҚШ Савдо вазири Говард Лутник бир кун ичида 1 000 та “олтин карта” сотилганини ва бу орқали ҳукумат 5 миллиард доллар даромад қилганини маълум қилди.