Тожикистондаги шифохоналарда COVID-19 га чалинган беморлар қолмади – ССВ

Тожикистон Соғлиқни сақлаш ва аҳолини ижтимоий ҳимоя қилиш вазири Жамолиддин Абдуллозода мамлакатдаги шифохоналарда коронавирусга чалинган беморлар қолмаганини эълон қилди. Бу ҳақда “Asia plus” хабар берди.

Таъкидланишича, ўтган йилнинг 31 декабрь ва янги йилнинг 1 январь кунлари Тожикистонда COVID-19 билан касалланиш бўйича бирорта ҳам ҳолат қайд этилмаган.

ССВ маълумотига кўра, Тожикистонда 30 апрелдан 31 декабргача коронавирусга чалинганлар 13 296 нафарга етган. Улардан 97 фоизи ёки 12 894 нафари соғайган. Шу вақт давомида 90 нафар бемор коронавирусдан вафот этган.

Вазир 1 январь ҳолатига 312 нафар бемор уй шароитида коронавируснинг енгил шаклидан даволанишда давом этаётганини маъумл қилди.

Унинг сўзларига кўра, воқеаларнинг бундай оптимистик сценарий бўйича кетиши учун пандемияни бошқаришга эришиш керак. 

“Арча ва корпоратив тадбирлар бекор қилинди, жамоат транспортлари, мунтазам авиақатновлар тўхтатилди. Таълим ва маданият муассасаларида эҳтиёт чоралари кучайтирилди”, деб қўшимча қилган вазир.

Шунингдек, бутун мамлакат бўйлаб ҳукумат ишчи гуруҳлари аҳолини шахсий ва жамоат гигиенасига амал қилишга чақириб келяпти.