Тошкентдан Паркентга электропоезд қатнови йўлга қўйилди

Бугун, 7 сентябрдан бошлаб “Паркент – Тошкент – Паркент” йўналишида замонавий шаҳарлараро электропоезд қатнови йўлга қўйилди. Бу ҳақда “Ўзбекистон темир йўллари” АЖ хабар берди.

Қайд этилишича, лойиҳа Ўзбекистон Президентининг 2025 йил 27 январдаги “Ўзбекистон Республикасининг транспорт-логистика тизимини янада ривожлантириш чора-тадбирлари тўғрисида”ги ПҚ-28-сон қарори асосида амалга оширилган.

Мазкур лойиҳа доирасида Тошкент вилоятидаги “Байтқўрғон – Паркент” темир йўл линияси қурилган. Қурилиш ишлари 2025 йил январь ойида бошланган.

Узунлиги 24 километр бўлган электрлаштирилган темир йўл линияси билан бирга 3 та темир-бетон кўприк, 1 та автомобиль йўл ўтказгичи, 76 та сув ўтказиш иншооти ҳамда 16 та автомобиль ва темир йўл кесишмаси барпо этилган. Шунингдек, 50 ўринли “Паркент” темир йўл бекати қурилган.

Янги электропоездда 586 та ўриндиқ мавжуд бўлиб, у жами 1 154 нафаргача йўловчини ташиши мумкин. Йўлкира нархи катталар учун 10 минг сўмгача, 10 ёшгача бўлган болалар учун эса 6,5 минг сўм этиб белгиланган. Паркентдан Тошкентгача бўлган йўлни поезд 50 дақиқада босиб ўтади.

Эслатиб ўтамиз, аввалроқ Урганч ва Хива шаҳарлари ўртасида йўловчиларга замонавий CR200J русумли тезюрар электропоезд хизмат кўрсатиши ҳақида хабар берилган эди.