Toshkentdagi ko‘chalardan biriga Mustafo Kamol Otaturk nomi beriladi

Toshkent shahridagi ko‘chalardan biriga Mustafo Kamol Otaturk nomi beriladi. Bu haqda Prezident Shavkat Mirziyoyevning kecha, 15 iyun kuni imzolangan “Toshkent shahridagi ko‘chalardan biriga Mustafo Kamol Otaturk nomini berish to‘g‘risida”gi qarorida so‘z boradi.

Qarorga ko‘ra, Toshkent shahri Yashnobod tumanida barpo etilayotgan “O‘zbek-turk do‘stligi” xiyoboniga yondosh bo‘lgan Abdulla Qodiriy ko‘chasining bir qismiga (Istiqbol, Farg‘ona yo‘li va Nukus ko‘chalari kesishmasidan Abdulla Qodiriy ko‘chasi va Mahtumquli shohko‘chasi kesishmasigacha) Mustafo Kamol Otaturk nomi beriladi.

Eslatib o‘tamiz, avvalroq Turkiyaning Hatay viloyati Arsus tumanida O‘zbekiston tomonidan bunyod etilgan turar joy majmuasi negizida tashkil etilgan “O‘zbekiston mahallasi”, Shavkat Mirziyoyev bulvari, shuningdek, Toshkent va Samarqand ko‘chalarining tantanali ochilish marosimi bo‘lib o‘tgandi.