Тошкентда ўтаётган футбол мусобақасида қиморга асосланган ўйин реклама қилинмоқда

Жорий йилнинг 10-20 июнь кунлари Тошкент ва Бишкек шаҳарларида Марказий Осиё футбол ассоциацияси (CAFA) томонидан “CAFA Nation’s Cup 2023” мусобақаси ўтказилади. Турнирда Марказий Осиё терма жамоалари билан бир қаторда Эрон ва Уммон жамоалари иштирок этади.

Эътиборлиси, мусобақа расмий сайтида букмекерлик компанияси турнирнинг бош ҳомийси сифатида кўрсатилган. Медиа тадбирларда ҳам букмекерлик конторраси рекламаларини кўриш мумкин. 

Қайд этиш жоиз, "Реклама тўғрисида"ги қонуннинг 46-моддасига кўра, Ўзбекистон ҳудудида қимор ва таваккалчиликка асосланган бошқа ўйинларни, шунингдек, телекоммуникация тармоқлари ва интернетдан фойдаланган ҳолда ташкил этиладиган қимор ўйинлари ва таваккалчиликка асосланган ўйинлар рекламаси тақиқланади.

2022 йил июнь ойи охирида Қирғизистон Президенти Садир Жапаров Қирғизистонда “Қимор ўйинларини қонунийлаштириш тўғрисида”ги қонунни имзолаганди. Қонун фақат чет эл фуқаролари ўйнаши мумкин бўлган казинолар фаолиятини тартибга солади. Мамлакатда маълум талабларга кўра, қиморга асосланган онлайн ўйинларни реклама қилиш мумкин. Шунингдек, Давлат молия назорати бошқармаси томонидан қимор ўйинлари учун алоҳида солиқ режими жорий этилган. 

Маълумот учун, букмекер бу эҳтимоллик назариясига асосланган, шунингдек, ютуқларни тахмин қилиш орқали олдиндан келишилган коэффициентлар билан (кўпинча спорт турлари) бўлажак турли тадбирларга нақд пул гаровларини қабул қиладиган профессионал мунозарачининг касби ҳисобаланади. Кўпгина букмекерларни ўзида жамлаб фаолият юритаёган ташкилотлар эса “букмекерлик конторалари” дейилади. 

Эслатиб ўтамиз, ўтган йилнинг ноябрь ойида Тошкентдаги “Пахтакор” стадионида Ўзбекистон ва Россия терма жамоалари ўртасида ўртоқлик ўйини бўлиб ўтганди. Ўша баҳсда ҳам стадион четидаги таблоларда Россия букмекерлик компанияси тарғиб қилинганди.