Тошкентда пора олган ИИБ терговчиси қамалди

Тошкент шаҳри Бектемир туманида пора билан қўлга тушган ИИО ФМБ терговчисига суд ҳукми ўқилди. QALAMPIR.UZ суд ҳужжати билан танишди.

Қайд этилишича, терговчи айбланувчи тариқасида жалб этилган аёлга нисбатан “қамоқ” эҳтиёт чораси қўлламасдан “гаров” эҳтиёт чораси қўллаш эвазига 500 АҚШ долларини пора тариқасида олган вақтида далилий ашёлар билан ушланган.

Суд мажлисида судланувчи эълон қилинган айбловга умуман иқрорлик билдирмаган.

Унинг сўзларига кўра, аёлнинг ишини қонун доирасида тез кўриб бергани учун аёл раҳмат сифатида 500 доллар бериб кетган.

Жиноят ишлари бўйича Мирзо Улуғбек туман суди судланувчини Жиноят кодексининг 210-моддаси (пора олиш) 1-қисмида назарда тутилган жиноятни содир этганликда айбли деб топган. Унга 3 йил Ички ишлар вазирлиги тизимида ишлаш ҳуқуқидан маҳрум қилинган ҳолда 2 йил муддатга озодликдан маҳрум қилиш жазоси тайинланган.

Эслатиб ўтамиз, аввалроқ Хоразм ва Фарғона вилоятларида олиб борилган тезкор тадбирда икки мансабдор пора билан ушланганди.