Тошкентда ноқонуний сақланаётган 1,1 млрд сўмлик спиртли ичимлик аниқланди

Тошкент шаҳрида яроқлилик муддати ўтган ва махсус суюқлик ёрдамида ўзгартирилиб, сотувга чиқариш учун тайёрлаб қўйилган катта миқдордаги ичимлик маҳсулотларининг муомалага киришининг олди олинди. Бу ҳақда Давлат хавфсизлик хизмати хабар берди.

Қайд этилишича, Тошкент шаҳрида спиртли ва салқин ичимликлар савдоси билан шуғулланувчи 2 та хусусий корхонанинг Яшнобод туманида жойлашган омборида катта қисмининг яроқлилик муддати ўтган, умумий қиймати 429 млн 629 минг сўмлик 79 172 дона салқин ичимликлар ҳамда 134 млн 845 минг сўмлик 3 374 дона спиртли ичимликлар сақланаётганлиги аниқланган.

Шунингдек, омборда кирим ҳужжатларига эга бўлмаган, қиймати 1 млрд 187 млн сўмлик маҳаллий ва хориждан келтирилган 25 746 дона турли хил спиртли ичимликлар мавжудлиги ҳам аниқланган.

Текширув давомида салқин ичимликларнинг асосий қисмининг яроқлилик муддати махсус суюқлик ёрдамида ўзгартирилиб, сотувга чиқариш учун тайёрлаб қўйилганлиги маълум бўлган.

Ўз навбатида, яроқлилик муддати ўтган ва кирим ҳужжатларига эга бўлмаган ичимликлар сифатини текшириш юзасидан экспертиза тайинланган. Ҳозирда терговга қадар текширув тадбирлари амалга оширилмоқда.

Эслатиб ўтамиз, 2024 йилнинг октябрь ойида Тошкент шаҳрида 2,2 млрд сўмлик яроқлилик муддати ўтган дори воситаларини муомалага киритилишининг олди олинганди.